Գաղտնի այցելություն. Տրանսպորտի, կապի և տեղեկատվական տեխնոլոգիաների նախարարի նախընտրական «հրավերով» այցը Գյումրի

Երբ Շիրակի մարզ են այցելում կառավարության անդամները, հաճախ տեղեկացնում են լրատվամիջոցներին, որոնք նախարարական այցը լուսաբանելուց զատ, նաև բարձրաձայնում են ոլորտի տարբեր խնդիրները ու լսելի դարձնում դրանք կառավարության նիստերին:

Բայց պարզվում է՝ նախարարական այցերը կարող են լինել հրավերով ու բոլորի աչքից հեռու կամ, ասենք, նախընտրական:

Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանն այցելել է Գյումրի: Ե՞րբ, անհայտ է, հավանաբար երեկ: Այս մասին ոչ մի տեղական լրատվամիջոցի չի տեղեկացվել: Միայն աշխատանքային օրվա վերջում տարածվում է արդեն պատրաստի տեսանյութ, որտեղ ներկայացվում է, թե ինչպես ԱԺ պատգամավոր Մարտուն Գրիգորյանի հրավերով Գյումրի է ժամանել Վահան Մարտիրոսյանն ու այցելել է Գյումրիի ավտոկայարան՝ տեղում կուտակված խնդիրներին ծանոթանալու համար:

Ի դեպ, տեսանյութը տարածում է Մարտուն Գրիգորյանի գրասենյակը, հետևաբար՝ այնպիսի մեկնաբանությամբ, որն ավելի ձեռնտու է պատգամավորին ու ներկայացվում է Մարտուն Գրիգորյանի գործունեությունը դրական լույսի ներքո, ու պատգամավորի անկեղծ մտահոգությամբ: Տեսանյութը նախընտրական չսկսված քարոզարշավն է հիշեցնում:

Նշենք, որ Մարտուն Գրիգորյանի ընտանիքին պատկանող «Տրանս Ակնթարթ» ընկերությունն ողևորափոխադրումներ է կատարում՝ լա՞վ, թե՞ վատ, այդ հարցին կանդրադառնանք առաջիկայում: Տարիներ անց, պարզվում է, որ Մարտուն Գրիգորյանն իր դժգոհություններն է ներկայացրել նախարարին ու մտահոգությունները, որ ուղևորափոխադրող ընկերությունները վնասով են աշխատում, ճանապարհներն էլ անբարեկարգ են: Նախարարը խոստացել է խնդրով զբաղվել:

Բայց հետաքրքիր է՝ եթե լինեին լրատվամիջոցները, ի՞նչը ջրի երես դուրս կգար, ինչը կբարձրաձայնվեր, որը ձեռնտու չէր լինի հրավիրողին…

NEWSPRESS.am