ՀՀԿ-ի նախկինը չի լինում

Նախընտրական շրջանում կրկին դաշտը վերաձևակերպում են, որ շարադրեն հերթական քաղաքական սահմանադրությունը՝ ՀՀԿ-ի խմբագրմամբ։

Ասում են՝ ՀՀԿ-ից գնում են, ՀՀԿ-ից հրաժարվում են. նման ահասարսուռ ձևակերպումները հանրությանը հերթական մոլորության մեջ գցելու համար են։ Ինչպես ասում են, ՀՀԿ-ի նախկին անդամ չի լինում։ ՀՀԿ-ն այնպիսի կառույց է ձևավորել, որ ո′չ այնտեղ մտնելն է պատահական, ո′չ այնտեղից դուրս գալը։

Նախընտրական շրջանում, սակայն, ժողովրդի համար հերթական շոուն է պետք, որը մեկ քայլ առաջ պետք է լինի, քան նախորդ շոուն։ Այս անգամ ինտրիգը հյուսվում է Հովիկ Աբրահամյանի շուրջ․ մարդ, ով հաշվարկով է ապրում, չի կարող այս պահին հաշիվներում սխալվել։

ՀՀԿ-ն կարողացավ ողջ «Գազպրոմ-Արմենիան» բերել ՀՀԿ, լվանալ երիտասարդների ուղեղները, կարո՞ղ էր իր նախընտրական ծրագրում սխալվել, իհարկե՝ ոչ։ ՀՀԿ-ն բարդ ու հակասական ճանապարհ է անցել, որ այս կարևոր պահին թողնի իր առանցքային անդամներին հեռանա՞լ։ Չէ՞ որ Հովիկ Աբրահամյանը շտաբի պետ էր, նա էր բոլոր հնարավոր ու անհնար մեքենայությունների միանձնյա հեղինակը և այսօր կհեռանա հենց այնպե՞ս՝ փեշերը թափ տալո՞վ։ Միամտություն է։

Ուղղակի ինտրիգը դեռ որոշ ժամանակ կպահպանվի, մինչև բոլոր քարտերը դրվեն սեղանին և անհայտությունից հայտնվի հերթական Արթուր Բաղդասարյանը։

Որքան էլ զարմանալի է, սակայն ՀՀԿ-ի միակ և անփոխարինելի հենարանը ԲՀԿ-ն է, եթե ՀՀԿ-ում չեն, ապա ԲՀԿ-ում են, եթե այս երկու կուսակցություններում չեն, ապա բանները բուրդ է։ Եթե մեկ անգամ հատում են կուսակցության շեմը, ապա մնում են այնտեղ․ ինչպես օրինակ` հավերժ երիտասարդ Կարեն Ավագյանը․ բոլորը հասունանում են, մեծանում են, զարգանում են, իսկ նա՝ ոչ։  Կարեն Ավագյանը պարզապես գտել է անմահության բանաձևը և ոչ ոք չի ասում։ Նա էլ նախկին երիտասարդ չէ, այլ մշտական։

Այնպես որ՝ Հայաստանը պատրաստվում է հերթական ընտրություններին՝ սովորական ընթացքով, նոր ծրագրով։ Եթե նախընտրական ինտրիգը ՀՀԿ-ի համար լիներ՝ կուսակցությունը թանկ կվճարեր, սակայն «հովիկաբրահամյան» ինտրիգը հանրության համար է, պարզապես ՀՀԿ-ն ընտրություններն իր ձևով է անցկացնելու։

NEWSPRESS.am