«Գարեգին Նժդեհ» ֆիլմն առանց Նժդեհի. Ֆիլմից հանվել են նժդեհական գաղափարախոսության որոշ տեսարաններ

«Գարեգին Նժդեհ» ֆիլմի երկրպագուներն անհանգստացած են: NEWSPRESS.am-ի խմբագրություն է ահազանգել մի հեռուստադիտող, ով իր մտահոգություն է հայտնել ֆիլմում կատարված փոփոխությունների վերաբերյալ:

Բանն այն է, որ «ԱրմՆյուզ» հեռուստաընկերության եթերով հեռարձակվում է «Գարեգին Նժդեհ» ֆիլմը, ներկայացվում է կրճատված տարբերակով:

Մեզ ահազանգող քաղաքացի Արմեն Պողոսյանը, մասնավորապես, նշեց մի քանի դրվագներ, որոնք ֆիլմի նախնական և դրանից հետո մի քանի ցուցադրությունների մեջ եղել են, իսկ այսօր չկան:

«Ես «Գարեգին Նժդեհ» ֆիլմ արդեն անգիր եմ արել այնքան նայել եմ, քանի որ այն ինձ շատ դուր է եկել: Ինձ մոտ կա նույնիսկ ֆիլմի՝ մինչ այս ցուցադրված, տարբերակը: Իսկ այն, ինչ այսօր ցուցադրվում է բավականին կրճատված և աղավաղված է»,- ասում է մեր զրուցակիցն ու մատնանշում Նժդեհի՝ արդեն հասուն տարիքի, դրվագներ, որի հիմքում ամբողջովին դրված էր նժդեհական գաղափարախոսությունն ու, որոնք այսօր հանվել են ֆիլմից: Նա մեզ տրամադրեց նաև հանված տեսարանների լուսանկարներ, որոնք նկարել էր իր տան հեռուստացույցից:

Արմեն Պողոսյանը, ով գրականությունից քաջ ծանոթ է Նժդեհի կյանքին, նկատում է՝ Ֆիլմում թողել են դրվագներ, որոնք ընդհանրապես չեն առնչվում սպարապետի հետ: Նա, մասնավորապես, նշում է Նժդեհի սիրուհու հետ կապված տեսարանները, որին մարմնավորում է Նազենի Հովհաննիսյանը: «Ես Նազենիի դեմ ոչինչ չունեմ, բայց այդ պոռնո  դրվագներն իրականությանը չեն համապատասխանում: Բան չունեմ, ասելու՝ գուցե ռեժիսոր Քեշիշյանը փորձել է այդ կերպ գեղարվեստական ինչ-որ գեղեցիկ երանգ տալ ֆիլմին, բայց դա ամբողջությամբ աղավաղել է իրականությունը: Ու հիմա նայում եմ ֆիլմը և զարմանում, եթե պետք է կրճատվեր այն ու հանեին ինչ-որ կադրեր, դրվագներ, ապա դա հենց ադ սիրավեպի հետ կապված տեսարանները պետք է լինեին, ոչ թե աղճատեին Նժդեհի խոսքն ու հետևաբար նրա գաղափարախոսությունը»,- վրդովված ու նեղսրտած ասում է 60-ամյա Պողոսյանը:

Նա նկատեց, որ ֆիլմը կրճատվել է մոտավորապես 1 ժամով:

Պարզաբանելու համար, թե ինչո՞ւ են ֆիլմից հանվել Նժդեհի հասուն տարիքի որոշ տեսարաններ, NEWSPRESS.am-ը փորձեց կապ հաստատել ֆիլմի ռեժիսորի՝ Հրաչյա Քեշիշյանի հետ, ով նաև «ԱրմՆյուզ» հեռուստաընկերության տնօրենն է, սակայն պարզվեց, որ նա Հայաստանում չէ: Մեզ հայտնեցին, որ Քեշիշյանը մեկնել է նկարահանումների և կվերադառնա մեկ շաբաթ հետո:

Քանի որ Գարեգին Նժդեհին հասուն տարիքում մարմնավորում է Արտաշես Ալեքսանյանը, ուստի փորձեցինք զրուցել նրա հետ ու հասկանալ, թե ինչո՞ւ են ֆիլմից հանվել իր մասնակցությամբ դրվագները: Արտաշես Ալեքսանյանը մեզ հետ զրույցում անկեղծ զարմացավ: Նա նշեց, որ չի նայել «ԱրմՆյուզ» -ով հեռարձակվող ֆիլմը ու տեղյակ չէ, թե ինչի մասին է խոսքը: Այն, ինչ տեսել է մինչ այդ՝ տեսել է մեծ էկրանին և ամբողջությամբ: Դերասանը հորդորեց այդ մասին խոսել ռեժիսորի հետ:

Սցենարի հեղինակ Քրիստ Մանարյանը մեզ հետ զրույցում նկատեց, որ Նազենի Հովհաննիսյանի հետ տեսարանները տեղին չէ կապել «պոռնկության» հետ, բայց թե ինչու են հանվել որոշ այլ տեսարաններ՝ նա չգիտի: Սցենարիստը նկատում է, որ ֆիլմն ի սկզբանե երկար էր ստացվել. «Գուցե Քեշիշյանը փորձել է կարճացնել ֆիլմը, կամ գուցե հեռուստատեսությամբ այլ կերպ են ցուցադրում, իսկ մեծ էկրանին արդեն ամբողջությամբ. Ես չգիտեմ…»,- ասաց Քրիստ Մանարյանը:

Ֆիլմի հերոսներից մեկի՝ դերասան Վիգեն Ստեփանյանի հետ մեզ այդպես էլ չհաջողվեց կապ հաստատել:

Այնպես որ՝ այս հարցի պատասխանը կարող ենք ստանալ միայն մեկ շաբաթ հետո, երբ Քեշիշյանը վերդառնա գործուղումից: Սակայն հարկ է նկատել, որ մինչ այս, առանց նժդեհական գաղափարախոսությամբ կադրերի կրճատման էլ կինոքննադատները կասկածել են՝ այն Նժդեհին արժանի՞ ֆիլմ էր, թե՞ ոչ:

Դեռ այն ժամանակ կարծիք կար, որ ռեժիսորը նպատակ է ունեցել Գարեգին Նժդեհի մասին ֆիլմ նկարահանել, բայց արդյունքում նկարահանել է ֆիլմ, որտեղ բացակայում էր Գարեգին Նժդեհն ու նրա գաղափարախոսությունը: Իհարկե, բացառությամբ որոշ դրվագների, որոնց մեծ մասն այսօր պարզվում է չկան:

Արմինե Մկրտումյան