Գյումրիի «աստվածավախ» նախկին քաղաքապետը միանում է «եկեղեցաշեն» Ծառուկյանին

Հինգ տարվա ընդմիջումից հետո, Գյումրիի նախկին քաղաքապետ Վարդան Ղուկասյանը պատրաստվում է վերադառնալ քաղաքականություն: Վերադառնում է, սակայն, ոչ թե որպես Հանրապետական, ինչպես եղել էր, այլ որպես «Բարգավաճ Հայաստան» կուսակցության անդամ՝ Գագիկ Ծառուկյանի դաշինքով:

NEWSPRESS.am-ի հարցին, թե ինչո՞ւ այսօր նա չի վերադառնում ՀՀԿ, Վարդան Ղուկասյանը պատասխանեց. «Իրենք են ինձնից հեռացել, 5 տարի մենք կապ չունենք իրար հետ: Ոչ մի առնչություն չկա Հանրապետականի հետ: Ներսում լավ մարդիկ կան, լավ ընկերներ ունեմ, բայց հինգ տարի քաղաքականության մեջ չեմ ու կուսակցությունից էլ դուրս եմ եկել դիմումիս համաձայն: Դիմումի մեջ կարծեմ գրել եմ, բայց եթե ավելի մանրամասն են ուզում ներկայացնեմ դիմումս, էլի կգրեմ»,- ասաց Ղուկասյանը:

Նա չցանկացավ անդրադառնալ ՀՀԿ-ից արտահոսքի մասին մեկնաբանություններին. «Տեղյակ չեմ՝ ինչ է կատարվում, ովքեր ներսում են, նրանցից հարցրեք»,- ասաց Ղուկասյանը:

Ինչ վերաբերում է Գագիկ Ծառուկյանի ղեկավարած կուսակցությունն ընտրելուն, ապա աստվածասեր ու աստվածավախ Վարդան Ղուկասյանի խոսքով՝ որոշումն Աստծո կամոք էր:

«Ծառուկյան Գագիկը եկեղեցաշեն մարդ է, ողորմած մարդ է, խիղճը չկորցրած մարդ է, իր կուսակցականների կողքին միշտ կանգնած է, նա կուսակցության բոլոր խնդիրներն իր վրա է վերցնում»,- ասաց մեր զրուցակիցը:

Դիտարկմանը, թե 2 տարի առաջ նա հուսախաբ արեց հույսն իր վրա դրած բազմաթիվ մարդկանց ու նաև իր կուսակիցներին և հեռացավ դաշտից, Վարդան Ղուկասյանն արձագանքեց. «Նա այդ ամենը գեղեցիկ մեկնաբանել է»: