«Է, թող դայակ վարձեն… այ քեզ բա՜ն». Աբովյանի քաղաքապետը՝ մանկապարտեզի վարձավճարները բարձրացնելու մասին

Աբովյան քաղաքի մանկապարտեզներում որոշել են կտրուկ ավելացնել վարձավճարները՝ 5500 դրամից հասցնելով 8000-ի: Ավելանում են բացառապես Աբովյանի քաղաքապետարանի ենթակայության ներքո գործող մանկապարտեզների վարձավճարները, որոնց թիվը հասնում է 9-ի:

NEWSPRESS.am-ին այս մասին ահազանգել են Աբովյանի մանկապարտեզների ծնողները:

Նրանք նշում են, որ նախ բավականին մեծ ֆինանսական խնդիրների առաջ կկանգնեն: Հատկապես խոսքը վերաբերում է այն ընտանիքներին, որտեղ կա նախադպրոցական տարիքի 2-3 երեխա: Բացի այդ, ծնողների կարծիքով, վարձավճարները բարձրացնելուց առաջ՝ հարկավոր է լուծել մի շարք խնդիրներ, որոնք այսօր առկա են մանկապարտեզում:

Այս օրերի համար` որպես առաջնային խնդիր, նրանք նշում են հարկադիր պարապուրդի մատնված մանկապարտեզների հարցը:

Մեզ հետ զրույցում ծնողներից մեկը նկատեց, որ աշխատանքի գնալիս, չգիտի, թե ում մոտ թողնի երեխային, քանի որ մանկապարտեզը փակ է՝ «ջեռուցում չկա, տնտեսում են երեխաների հաշվին»,– ասաց վրդովված ծնողը:

«Ինչպե՞ս չկա ջեռուցում, բոլոր մանկապարտեզներն էլ ջեռուցվում են, ուղղակի հիմա ժամանակավորապես փակ են»,- NEWSPRESS.am-ի հարցին ի պատասխան՝ նեղսրտելով ասաց Աբովյանի քաղաքապետ Վահագն Գևորգյանը:

Եթե ջեռուցվում են, ինչո՞ւ են փակ, տնտեսո՞ւմ եք՝ հարցին, քաղաքապետը զարմացած տոնով պատասխանեց. «Դե որովհետև ցուրտ ա, էս ամբողջ հունվար ամիսը միշտ էլ փակվում ա»,- ասաց նա ու հավանաբար զգալով իր սխալը՝ փորձեց ուղղել իրեն. «Դե ցուրտ եղանակ ա»:

Դիտարկմանը, որ Երևանում եղանակը ևս ցուրտ է, բայց այստեղ մանկապարտեզներն աշխատում են հունվարի 9-ից, և մանկապարտեզների շենքերում ջերմաստիճանը չի իջնում +20-ից, քաղաքապետը, ըստ էության, չպատասխանեց: Նա նկատեց, որ Աբովյանում էլ չջեռուցվող մանկապարտեզ չկա, որ երեխայի համար պայմանները վատ լինի:

«Մենք վառարանով ջեռուցվող մանկապարտեզ, ցուրտ պայմաններ… նման խնդիր չունենք… չեն աշխատում, որովհետև էս ամսին միշտ էլ չեն աշխատում, հարկադիր պարապուրդ ա…»,- ասաց քաղաքապետը՝ այդպես էլ հստակ չպարզաբանելով, թե մասնավորապես ինչի՞ հետ է կապված այդ հարկադիր պարապուրդը:

Ինչ վերաբերում է վարձավճարների բարձրացմանը, ապա Վահագն Գևորգյանը նկատում է, որ յուրաքանչյուր երեխայի համար ամսական ծախսվում է 22 000 դրամ, մինչդեռ իրենք յուրաքանչյուր երեխայից ուզում են ընդամենը 8 000 դրամ, մնացած 14 000 դրամը համայնքն է վճարում:

«Մի մոռացեք, որ մենք սպասարկում ենք նաև Աբովյանի կողքի շրջանների գյուղերը»,- ասաց Վահագն Գևորգյանը՝ պարզաբանելով, որ հարևան գյուղերից շատ հաճախ բերում են Աբովյանի մանկապարտեզ՝ իհարկե ավելի բարձր վարձավճարով:

«Մեր ունեցած միջոցներով հնարավոր չէ պահել մանկապարտեզը: Եթե մենք հիմա չբարձրացնենք վարձավճարները՝ չենք կարող պահել էդ մանկապարտեզները, ու տարվա կտրվածքով հնարավոր է՝ 2-3 ամիս մանկապարտեզները չաշխատեն: Արդեն այստեղ դժգոհությունը շատ ավելի մեծ կլինի»,- նկատեց քաղաքապետն ու ներկայացրեց իր հաշվարկները. «Մի ծնողի վրա վարձավճարն ավելանում է ընդամենը 2500 դրամով, իսկ համայնքը մոտավորապես օգտվում է 40 մլն դրամից, որն ուղղվելու է մանկապարտեզի պահպանմանը»:

Իհարկե չենք քննարկում, թե իրականում ուր կարող են ուղղվել այդ գումարները, սակայն չի բացառվում նաև, որ վարձավճարները բարձրացնելուց հետո, շատ երեխաներ այլևս չհաճախեն մանկապարտեզ, և համայնքից նրանց համար ծախսվելիք գումարն, ըստ էության, ևս կտնտեսվի:

Այս դիտարկմանն ի պատասխան՝ քաղաքապետն արձագանքեց. «Է՜, դե հիմա դուք ինչպես կուզեք՝ կմեկնաբանեք, բայց ախր…. Ասեմ, էն նախորդ 5500 դրամի ժամանակ էլ ծնողները գալիս ասում էին, որ չեն կարող վճարել, մենք կա′մ զեղչել ենք, կա′մ ընդհանրապես զիջել ենք, հիմա էլ նույնը կանենք»:

Այս դեպքում թերևս վարձավճարների բարձրացումն անտրամաբանական է դառնում, քանի որ երեխաների ծնողների մի մասը վճարելու է մյուս մասի փոխարեն:

Բայց արդեն այս մասին Վահագն Գևորգյանը չի մտածում, նա պետական մանկապարտեզը համեմատում է մասնավորի հետ ու ասում, որ այնտեղ մարդիկ 50-60 հազար դրամ են տալիս: Նա այս համեմատականն անցկացնելիս՝ մոռանում է մատնանշել նաև, որ մասնավորը բավարարում է ծնողների մի շարք պահանջներ, որոնք, մասնավորապես, Աբովյանի պետական մանկապարտեզը դժվարանում է ապահովել: Ծնողներն, օրինակ դժգոհում են սննդից: Ասում են, որ կերակրացանկը երբեք պատին փակցված չի լինում, երեխան էլ քաղցած է գալիս տուն, կամ ամեն օր ասում է, թե ոսպով ապուր են կերել:

Խնդիրներից մյուսն էլ մանկապարտեզի աշխատանքային ժամն է, որը չի համապատասխանում նույնիսկ, մյուս քաղաքների պետական մանկապարտեզի ժամերի հետ, ուր մնաց մասնավորի:

Պարզվում է՝ Աբովյանի մանկապարտեզում երեխաներին մանակապարտեզից վերցնում են ժամը 16:00-ին, քանի որ դաստիարակները պահանջում են շուտ վերցնել երեխաներին: Մինչդեռ, երեխան կարող է մանկապարտեզում մնալ մինչև 17:30-ը: Աշխատող ծնողների համար սա իհարկե դժվարություններ է ստեղծում:

«Է, թող դայակ վարձեն… այ քեզ բա՜ն»,- այս դիտարկմանն ի պատասխան՝ արձագանքեց Աբովյանի քաղաքապետը:

Հավանաբար, Վահագն Գևորգյանի ձայնը, գոնե առայժմ, տաք տեղից է գալիս, քանի որ նա ոչ միայն ԲՀԿ առաջնորդ Գագիկ Ծառուկյանի մերձավորն է, այլև ՏԻՄ ընտրությունների ժամանակ ու մինչ օրս անկուսակցական քաղաքապետը վայելում է ՀՀԿ-ի աջակցությունը:

Արմինե Մկրտումյան