Ծառուկյանն աղոթում է ՀՀԿ-ի փրկության համար

Պարզվում է՝ Ծառուկյանը բավականին համառն է, նա նաև համբերատար է և սիրում է երկրի Նախագահին և երկիրը։

Հայաստանում, ասում են, սերն է պակաս, սակայն երևի բնությունն այն դրել է միակողմանի նժարի վրա, և բացի Ծառուկյանից, հայ ժողովրդին ոչինչ չի հասել։ Նման անսահման սեր միայն երևի ընտրյալներին է հասու։

Հաճախ կարելի է հանդիպել, որ այս կամ այն պատճառով արտագաղթել են, ծանր են տանում անարդար վերաբերմունքը, ցանկանում են արդարություն տեսնել երկրում. սա հաճախ է դառնում արտագաղթի պատճառ։

Սակայն Ծառուկյանը կենդանի մարմնացումն է ծով համբերության և ծով իմաստության՝ առ երկրային չնչին զգացողությունները։

Հնարավոր է՝ Ծառուկյանի նման անսահման սիրո համար հիմք է ծառայել այն, որ նա կանաչ բարձունքում է բնակվում, իսկ մնացածը՝ լեռան ստորոտում․ վերևից երևի ավելի լավ է տեսանելի Հայոց աշխարհը, քան ներքևից։

Ի վերջո, Ծառուկյանը մեր ժողովրդի ընտրյալն է, հայտնի բարեգործ, որի մասին որևէ կերպ հնարավոր չէ մոռանալ ամեն քայլափոխի․ իսկը՝ Ձմեռ պապ: Ամանորն ավարտվել է, սակայն հայ ժողովուրդը մինչև հաջորդ Ամանոր հիշելու է Ծառուկյանի ամանորյա նվերները։

Նա, իհարկե, ժողովրդին սիրում է, սակայն իր ձևով։ Ասում են՝ կենդանի հայ մարդ տեսնելով՝ այնքան է ուրախանում, որ փողերի արտահոսք է սկսվում։

Կարճ ասած՝ Ծառուկյանը մեր երկրի խիղճն է։ Հենց ասում են՝ գնա, գնում է, երբ ասում են՝ արի, գալիս է, հրաժարվում են, սակայն նա անուղղելի լավատես է և հավատում է, որ Ազգային ժողովում կարող է աջակցել ՀՀԿ-ին։

Ծառուկյանը հիշեցնում է այն ճգնավորներին, ովքեր իրենց կյանքը նվիրաբերել են միայնության մեջ խորհելուն՝ երկրային մեղքերի թողության մասին․ համբերատար տանում են երկրային չարչարանքները՝ երազելով հասնել վերին երջանկության։

Եվ իզուր չէ, որ նա բնակվում է բարձունքում, նա աղոթում է, երբ ամեն անգամ ՀՀԿ-ն գնում է խոտոր ճանապարհով և հրաժարվում Ծառուկյանի պրոյեկտից։

NEWSPRESS.am