Եթե ընտրությունները բարեհաջող անցնեն՝ կկատարվի Վիգեն Սարգսյանի երազանքը. նա կմնա ՊՆ-ում

ՀՀ պաշտպանության նախարար Վիգեն Սարգսյանի գնահատմամբ՝ ներկայիս կառավարությունը հաջողված է, և իր համար մեծ պատիվ է աշխատել: Այդ մասին նախարարը հայտնեց այսօր լրագրողների հետ հանդիպմանը:

Նա նշեց, որ պատրաստվում է մասնակցել նաև ընտրությունների քարոզարշավին, սակայն կմասնակցի այն ծավալով, որը կուսակցությունը նպատակահարմար կգտնի:

«Անելու եմ ամեն ինչ, որ իմ մասնակցության առումով օրենքի տառը և ոգին չխաթարվի»,- ասաց Վիգեն Սարգսյանը:

Նա չպատասխանեց ՀՀԿ ցուցակին վերաբերվող հարցին. «Ես նմա՞ն եմ մի մարդու, ով կարող է իր կուսակցությունից առաջ ընկնել ցուցակը հրապարակելու առումով: Կուսակցությունը կհրապարակի ցուցակը, և որևէ մեծ ինտրիգ, կարծում եմ, չկա»,-ասաց նա:

Դիտարկմանը, թե լուրեր են շրջանառվում, որ Վիգեն Սարգսյանն ուզում է վարչապետ դառնալ, նախարարն ասաց, որ իր համար ՊՆ-ի աշխատանքը ամենահետաքրքիր, պատասխանատու և կարևոր աշխատանքներից մեկն է:

«Չեմ կարծում, որ պետք է համադրել այս պաշտոնն այլ պաշտոնի հետ: Ես ունեմ մեկ երազանք, որ ընտրություններում ապահովենք այնպիսի արդյունք, որը թույլ կտա ինձ առաջիկա տարիներին աշխատել ՊՆ-ում, քանի որ այստեղ կան շատ անելիքներ, և կարծում եմ, որ այս գործառույթն այն կարևորության է, որ անհամադրելի է որևէ բանի հետ»,- ասաց նա և հույս հայտնեց, որ ընտրությունները բարեհաջող անցնելուց հետո ՀՀ Նախագահը թույլ կտա շարունակել իր աշխատանքը: