Գագիկ Ծառուկյանը ՀՀԿ պրոյեկտ չէ

ՀՀԿ խորհրդի այսօրվա նիստում Սերժ Սարգսյանն անդրադարձել է շրջանառվող այն լուրերին, թե Գագիկ Ծառուկյանը ՀՀԿ պրոյեկտն է:

«Ասում են՝ ՀՀԿ-ի պրոյեկտն է, կեղծ ընդդիմություն է, նման բան չկա: Հավատացեք Աստծուն, ես ինչ ասում եմ՝ նախագահի ելույթից եմ ասում»,- մեջբերելով նախագահի խոսքերը՝ լրագրողներին ասել է ՀՀԿ մամուլի քարտուղար Էդուարդ Շարմազանովը:

Անդրադառնալով ՀՀԿ-ից արտահոսքին՝ Շարմազանովը դարձյալ մեջ բերել է նախագահի խոսքը՝ «Սերժ Սարգսյանի խոսքով՝ դա անհեթեթություն է»,- ասաց նա՝ հավելելով, որ ՀՀԿ-ն կենդանի օրգանիզմ է, կարող է մի քանի հոգի էլ դուրս գան, առաջին անգամ չէ:

«Վերջին ամիսներին ՀՀԿ-ին անդամագրվել է 11 հազար մարդ»,- նշեց Շարմազանովը:

Նկատենք, որ ՀՀԿ խորհրդի կազմից դուրս է մնացել 9 մարդ: Այդ ցանկում չկա Սյունիքի նախկին մարզպետ Սուրիկ Խաչատրյանի անունը:

Ինչ վերաբերում է ՀՀԿ նախընտրական ցուցակին, ապա այն որոշված չէ, քննարկումները շարունակվում են, օրենքով նախատեսված ժամկետում այն կներկայացվի Կենտրոնական ընտրական հանձնաժողով:

Փոխարենը որոշված է նախընտրական շտաբի ղեկավարի անունը, որը սակայն Շարմազանովը չհայտնեց:

Փոխանցելով Սերժ Սարգսյանի խոսքը՝ նա նշեց, որ ընտրությունների օրն ապրիլի 2-ին նշանակելը հակասահմանադրական չէ, բայց հաշվի առնելով ապրիլյան գործոնը, ՀՀԿ-ն պատրաստ է փոխել ընտրությունների օրը:

«Եթե բոլոր քաղաքական դերակատարները գան քաղաքական պայմանավորվածության, որ երեք, չորս կամ հինգ օրով հետաձգեն ընտրության oրը, ապա ՀՀԿ-ն այստեղ որևէ քաղաքական խոչընդոտ չի տեսնում: Մենք պատրաստ ենք բոլոր քաղաքական ուժերի հետ քննարկելու այս հարցը»,- ասաց նա:

Շարմազանովն անդրադարձավ նաև դաշինքների կազմավորմանը:

«Մենք ասում էինք, որ սահմանադրական բարեփոխումներից հետո Հայաստանում կուսակցությունների դերակատարումը շեշտակի բարձրանալու է, և տեղի է ունենալու կուսակցությունների խոշորացում, որը դրական է: Այսօր մենք տեսնում ենք, որ կուսակցությունները միավորվում ու դաշինքներ են կազմում, ինչին ՀՀԿ-ն դրական է վերաբերում»,-ասաց նա: