Զինվորի մահվան մեջ մեղադրվող բժիշկը դեռևս աշխատում է

ՀՀ Զինված ուժերի ռազմաբժշկական վարչության պետ, գնդապետ Կամավոր Խաչատրյանն այսօր հրավիրված մամուլի ասուլիսի ժամանակ հայտնեց, որ պետության միջոցներով առաջիկայում 3 զինծառայող մեկնելու է արտերկիր` բուժում ստանալու: Զինվորները վիրավորվել են ապրիլյան պատերազմից առաջ:

Գերմանիայում իր բուժումը կշարունակի Մհեր Պետրոսյանը, ով գլխի շրջանում էր վիրավորում ստացել: Վիրավորներից Աշոտ Գրիգորյանը, ում արմնկային հոդը բացակայում է, ու պրոթեզավորման անհրաժեշտություն կա, կպրոթեզավորվի Ռուսասատոնում, որտեղ գործող կլինիկայում էլ հենց հետազոտություն է անցկացել:

Մհերն ու Աշոտը, բուժման կմեկնեն կառավարության որոշմամբ: Երրորդ զինվորը ՌԴ-ում կենթարկվի աչքի վիրահատության:

Պատասխանելով լրագրողների հարցին՝ Կամավոր Խաչատրյանն անդրադարձավ նաև զինծառայողի մահվան մեջ մեղադրվող` Գեղարքունիքի կայազորային հոսպիտալի պետ Ե. Հովհաննիսյանին աշխատանքից ազատելու խնդրին: Կամավոր Խաչատրյանը նշեց, որ Հովհաննիսյանը դեռևս աշխատում է:

«Հովհաննիսյանը բավականին փորձառու վիրաբույժ է, երկար տարիներ աշխատում է այս ոլորտում: Այժմ քննություն է ընթանում, մեղքի աստիճանը ցույց կտա քննությունը, կոռեկտ չի լինի, որ ես մեկնաբանեմ»,- ասաց նա:

Հիշեցնենք, որ ըստ Քննչական կոմիտեի` 2015թ. սեպտեմբերի 5-ին՝ ժամը 23:15-ին, ավտոպատահարից անմիջապես հետո, «Գանգուղեղային փակ տրավմա, աջ ականջախեցու աջակողմյան պնևմոթորաքս, տրավմատիկ շոկ, վիճակը ծանր» ախտորոշմամբ Վարդենիսի զինվորական կայազորային հոսպիտալ է տեղափոխվել զինծառայող Ս. Գասպարյանը և ենթարկվել կլինիկական, գործիքային հետազոտությունների։

Նախնական քննության ընթացքում ձեռնարկված բազմաթիվ քննչական գործողությունների, նշանակված դատաբժշկական փորձաքննությունների արդյունքում պարզվել է, որ Ե.Հովհաննիսյանը ճիշտ չի գնահատել Ս. Գասպարյանի օբյեկտիվ վիճակը, պատշաճ կերպով չի իրականացրել անհրաժեշտ բուժական-ախտորոշիչ միջոցառումները, ժամանակին չի կազմակերպել վիրահատական միջամտությունը՝ որովայնահատում, պատռվածքների կարում, փայծաղի հեռացում, որը հնարավորություն կտար կանխելու շոկային վիճակի ծանրագույն հետևանքները։

Ս. Գասպարյանը 2015թ. սեպտեմբերի 11-ին մահացել է: Ձեռք բերված ապացույցների համակցությամբ` Ե. Հովհաննիսյանին մեղադրանք է առաջադրել ՀՀ քրեական օրենսգրքի 130-րդ հոդվածի 2-րդ մասով (բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը՝ որն անզգուշությամբ առաջացրել է բուժվող հիվանդի մահ)»: