«Հրապարակ». «Դաշինքներից կազմված դաշինք» չի ձևավորվելու. Ծառուկյանը զայրացել է․ «Իմ ժողովրդին ի՞նձ եք ծախում»

«Հրապարակ» օրաթերթը գրում է.

«Գագիկ Ծառուկյանի մոտ «շտապողների» շարքերը ստվարանում են։ Լավատեղյակներն ասում են՝ ով ասես, որ չի ձգտում այս օրերին հանդիպել նրան, օգտվել Ծառուկյան «շոգեքարշից»։

Ամենայն հավանականությամբ, այս դաշինքը շատ խայտաբղետ է լինելու՝ ռամկավարներից մինչև հնչակներ, ազատականներից մինչև պահպանողականներ, նախկին ՀԱԿ անդամներից մինչև իշխանության թևից փախածներ։ Եվ չնայած Ծառուկյանն ի սկզբանե հակված էր շատ մեծ դաշինք ձևավորելուն, որի մեջ կարող էին մտնել նաև Սեյրան Օհանյանի շուրջ միավորվող ուժերը, անգամ Նիկոլ Փաշինյանն ու եռյակ կազմած «Ելքը», սակայն, ըստ ամենայնի, «դաշինքներից կազմված դաշինք» չի ձևավորվելու։

Իրեն հաճախ այցելող Սեյրան Օհանյանին Ծառուկյանը հասկացրել է, որ նեղացած է նրանց պահվածքից՝ չէ՞ որ նրանք իրենց դաշինքի մասին հայտարարեցին նույն օրը, Ծառուկյանի հայտարարությունից մի քանի ժամ անց։ Ճիշտ կլիներ, որ սպասեիք, բանակցեիք, նոր հայտարարեիք՝ մոտավորապես ասել է Ծառուկյանը։

Իսկ երբ խոսք է գնացել համագործակցության ձևի և ցուցակների կազմման մասին, Ծառուկյանը զայրացել է․ «Իմ ժողովրդին ի՞նձ եք ծախում»։ Ասել է նա, նկատի ունենալով Օսկանյանին, Էլինար Վարդանյանին, Վահե Հովհաննիսյանին, ովքեր ԲՀԿ-ից են պատգամավոր դարձել։ Նա նաև հասկացրել է, որ մի քանի անդամ ունեցող Դեմոկրատների Արամը, վերլուծաբաններ Թևանյանն ու Բոզոյանը չեն կարող «ոտք գցել» Ստեփան Դեմիրճյանի, Ալիկ Արզումանյանի, Արարատ Զուրաբյանի հետ, ովքեր այս օրերին բանակցում են Ծառուկյանի դաշինք մտնելու շուրջ»։

Մանրամասները՝ թերթի այսօրվա համարում