Դինաստիայով ուզում են փոխանցել պատգամավորական մանդատն իրենց որդիներին. քաղաքագետ

Քաղաքագետ Գագիկ Համբարյանը չի զարմանում, որ ընդամենը երկու օր առաջ մտերիմ համարվող ընկերները, ովքեր այսօր նույն կուսակցության ռեյտինգային ցուցակում են հայտնվել, հնարավոր է՝ այլևս չբարևեն իրար:

Քաղաքագետի դիտարկմամբ՝ Հանրապետության և ՀՀԿ նախագահ Սերժ Սարգսյանի համար, բացարձակ միևնույնն է, թե ինչ իրավիճակ կստեղծվի ընտրությունների պատճառով՝ անձերի միջև:

«Սերժ Սարգսյանը, կոպիտ ասած, թքած ունի միջանձնային հարաբերությունների վրա, նրա համար կարևորը ձայն հավաքելն է Հանրապետական կուսակցության համար»,-NEWSPRESS.am-ի հետ զրույցում նկատում է Գագիկ Համբարյանը:

Նրա խոսքով՝ այն անձինք, ովքեր այդքան տարիներ բարձր պաշտոններ են զբաղեցրել մարզերում և հետագայում ընտրություններից հետո փորձել են իրենց չարած գործերը վերագրել ուրիշներին, իսկ ուրիշների արած գործերը՝ իրենց, իշխանությանը համոզել են, որ դիմացինն է մեղավոր (օրինակ՝ նախագահական վերջին ընտրություններում Սերժ Սարգսյանի՝ որոշ տեղամասերում պարտություն կրելու համար): Հիմա նախագահը, քաղաքագետի որակմամբ, հետաքրքիր մոտեցում է դրսևորում:

«Սերժ Սարգսյանը տնային աշխատանք է հանձնարարել համապատասխան հիմնարկ ձեռնարկություններին, ովքեր ընդգրկված են վարկանիշային ցուցակում և ունեն 5-6 հարյուր աշխատող: Նրանց Սերժ Սարգսյանը պարտադրում է համապատասխան քանակությամբ ձայներ բերել կուսակցությանը: Այսինքն՝ և՛ իրենց, և՛ կուսակցությանը: Ու եթե այդ քանակությունը չապահովեն, ապա իրենք կզրկվեն իրենց պաշտոնից, որովհետև երկար տարիներ զբաղեցնելով այդ պաշտոնը՝ նրանք օգտվել են ամեն ինչից, ինչը տվել է իշխանությունը նրանց»,- պարզաբանում է Գագիկ Համբարյանը:

Քաղաքագետը նշում է, որ այս առումով թերևս լիովին հասկանում է Սերժ Սարգսյանին. մարդիկ բարձր պաշտոն ստանձնելով՝ բացարձակ ոչինչ չեն արել և բոլոր անհաջողությունների մեջ մեղադրել են շրջապատին: Նախագահն ապացույց չուներ, թե ով ինչ աշխատանք է տարել: Այժմ ամբողջը ջրի երես դուրս կգա ապրիլի 3-ի առավոտյան, երբ կերևա, թե ով ինչքան ձայն է բերել Սերժ Սարգսյանի հարազատ կուսակցությանը:

Գագիկ Համբարյանի խոսքով՝ Նախագահը կոնկրետ մարդկանց հանձնարարել է մտնել ռեյտինգային ցուցակ և ձայներ բերել:

Քաղաքագետը նկատում է, որ շատ ուրախ կլիներ, եթե այդ ռեյտինգային ցուցակում լինեին իսկապես արժանի մարդիկ՝ քաղաքագետներ, գրագետ տնտեսագետներ, ովքեր կհասկանային, թե ինչ է կապիտալիստական երկրների տնտեսությունը, կլինեին դիվանագետներ:

«Ցավոք սրտի, ունենք այն, ինչ ունենք: Ես ինչքան նկատում եմ, այս ռեյտինգային ցուցակներն ուղղակիորեն վիրավորանք են հասարակության համար. Մհեր Սեդրակյանին փոխարինում է նրա որդին, մեկ ուրիշին՝ դուստրը, չգիտես ում՝ եղբոր որդին, այսինքն՝ դինաստիայով ուզում են փոխանցել պատգամավորական մանդատն իրենց բարեկամներին… այդ կռիվն է գնում հիմա»,- ընդգծեց Գագիկ Համբարյանը: