ՀՀԿ-ն ընկել է տնետուն

Գյումրիում կուսակցություններն սկսել են տնից տուն գնալ՝ հարցնելու ընտրողների ընտրական նախասիրությունների մասին՝ ո՞ւմ են ընտրելու, ինչո՞ւ, ճանաչո՞ւմ են այս կամ այն կուսակցության ներկայացուցչին, ինչպե՞ս են գնահատում նրանց գործունեությունը:

NEWSPRESS.am-ի՝ Շիրակի մարզի թղթակիցը տեղեկացնում է, որ բարետես արտաքինով աղջիկները թաղամասից թաղամաս, տնից տուն գնալով հարցումներ են կատարում ու ընտրողներից պարզում հատկապես կուսակցությունների նկատմամբ վերաբերմունքը: Նշում են, որ անկախ են ու սոցիոլոգիական հարցումները որևէ կուսակցության պատվերը չեն:

Բայց մի քանի հարցից հետո արդեն հստակ է դառնում պատվիրատուն: Ներկա, նախկին ու «գալիք» հանրապետականների մասին հարցերից պարզ է, որ պատվիրատուն իշխող կուսակցությունն է: Նախ հարցնում են, թե արդյոք ճանաչո՞ւմ են տվյալ քաղաքական գործչին, թե՞ ոչ: Ու ևս մեկ բացահայտում է կատարվում. Շիրակի մարզի ՀՀԿ-ի վարկանիշային ցուցակն են ուղղակիորեն ներկայացնում:

1. Սերգեյ Ամիրբեկյան – Շիրակի ԳԳՄ տնօրեն,
2. Սուքիաս Ավետիսյան – ԱԺ պատգամավոր,
3. Խաչատուր Բալասանյան – Գյումրիի քաղաքապետ Սամվել Բալասանյանի որդին,
4. Կարեն Գոմցյան – «Լենտեքս» ՍՊԸ-ի հիմնադիր տնօրեն,
5. Վարդիթեր Գասպարյան – Ախուրիկի գյուղապետ,
6. Վահան Գասպարյան – «Հարավկովկասյան երկաթուղի» ՓԲԸ Գյումրիի մասնաճյուղի տնօրեն,
7. Մարտուն Գրիգորյան – ԱԺ պատգամավոր /նախկին ԲՀԿ-ական/,
8. Հրայր Կարապետյան – Շիրակի մարզպետարանի կրթության վարչության պետ,
9. Ջեմմա Հարությունյան – Ամասիայի համայնքապետ,
10. Վարդան Մարտիրոսյան – «Շիրակի ջրմուղկոյուղու» տնօրեն,
11. Սահակ Մինասյան – Շիրակի համալսարանի ռեկտոր,
12. Ազգանուշ Մնացյան – Ազատան մանկապարտեզի տնօրեն, դասավանդում է Շիրակի համալսարանում,
13. Մուշեղ Պետոյան – Աժ պատգամավոր /նախկին ԲՀԿ-ական/,
14. Արման Սահակյան – ԱԺ պատգամավոր, «Շիրակ» ֆուտբոլային ակումբի սեփականատեր,
15. Ռուբիկ Սանոյան – Գյումրիի փոխքաղաքապետ,
16. Խաչատուր Վարագյան – Արթիկի նախկին քաղաքապետ,
17. Ֆելիքս Ցոլակյան – Շիրակի նախկին մարզպետ, նախագահի վերահսկողական ծառայության պետ,
18. Գագիկ Ֆարզադյան – Շիրակի «Հայաստանի էլեկտրական ցանցեր» «Ղարս» մասնաճյուղի տնօրեն

Հարցաշարը բավական ընդգրկուն է. նախ ինչպե՞ս եք գնահատում տվյալ անձի գործունեությունը 10 բալանոց սանդղակով, եթե վաղը ընտրություններ լինեն՝ ո՞ւմ կընտրեին, և տեղյա՞կ են, թե որ կուսակցության անդամ է տվյալ անձնավորությունը ու եթե անդամակցի կամ հրաժարվի հանրապետական կուսակցությունից, վերաբերմունք կփոխվի՞ արդյոք:

Ուշագրավ էր մի հարց. «Ի՞նչը կփոխեր Ձեր վերաբերմունքն ու ընտրությունը»՝ առաջարկելով հետևյալ տարբերակները՝ ծանոթ-բարեկամի հորդորը, աշխատանքի առաջարկը, գումարային օգնությունը:

Փաստորեն, ընտրություն կատարելու համար, բոլոր այս տարբերակները Հանրապետականը կառաջարկի, միայն թե նորից մտափոխվող ընտրողի համար իրատեսական տարբերակը գումարն է. ծանոթ-բարեկամներն արտագաղթել են, աշխատանքի առաջարկն էլ ընտրություններից հետո մոռանում է առաջարկողը: