Շիրակի մարզպետը «Պոբեդա»-ով վերադարձել է, Ուլյանովսկից լիքը բարևներ է բերել

Շիրակի մարզպետ Հովսեփ Սիմոնյանը եռօրյա այցով մեկնել էր ՌԴ Ուլյանովսկի նահանգ՝ տարբեր ոլորտներում համագործակցության հնարավոր ուղիներ գտնելու: Այս անգամ խոսքը ոչ միայն մշակույթին է վերաբերում, այլև գյուղատնտեսությանը, զբոսաշրջությանն ու արդյունաբերությանը:

Շիրակի մարզի և  Ուլյանովսկի երկրամասի միջև դեռևս 2009 թվականին «Առևտրատնտեսական, գիտատեխնիկական, սոցիալական և մշակութային համագործակցության մասին» համաձայնագիր կնքվել է: Անցած տարիներին փոխադարձ այցելություններ ու մշակութային կրթական ոլորտներում համագործակցություն ծավալվել է, բայց այս անգամ նախատեսվում է ընդլայնել համագործակցության շրջանակը:

«Հնարավոր է նաև համագործակցություն հիմնականում գյուղատնտեսության ոլորտում: Օրինակ՝ մեր մարզին Ուլյանովսկի ֆերմերներինց հարկավոր է էլիտար սերմնացու: Իրենք կաթնամթերքի լուրջ պահանջարկ ունեն, եթե մեր գործարարները կարողանան մի հատ գնալ, տեսնել, կկարողանանք արտահանումը կազմակերպել: Նրանք նաև ջերմոցների անհրաժեշտություն ունեն, եթե մենք կարողանանք այստեղից մեր բանջարեղենը արտահանել…Ես հիմա մտածում եմ արագ հրավիրել գյուղատնտեսության ոլորտի գործարարներին, զրուցեմ իրենց հետ, հիմա բնական է՝ կարտոֆիլի մասին խոսելն իմաստ չունի՝ կապված սեզոնի հետ, իսկ այս պահին կաթնամթերքի արտահանումը կարելի է կազմակերպել»,- NEWSPRESS.am-ի` Շիրակի մարզի թղթակցի փոխանցմամբ՝ նշեց մարզպետ Հովսեփ Սիմոնյանը՝ հավատացնելով, որ հնարավոր է նաև զբոսաշրջության և տեղեկատվական տեխնոլոգիաների ոլորտների համագործակցությունը:

Շիրակի մարզպետը նաև հավելեց, որ պայմանավորվածություն է ձեռք բերվել հայկական առևտրի կենտրոն կառուցելու, որտեղ կներկայացվի հայկական արտադրանքը, հատկապես Շիրակի մարզի արտադրանքը: Հովսեփ Սիմոնյանը հիացած էր Ուլյանովսկի հայկական համայնքով: Քաղաքի 6500 բնակչից 2000-ը հայեր է, կան նաև գյումրեցիներ: Ուլյանովսկի կենտրոնում կառուցվում է հայկական եկեղեցի, որի բարձրությունը 35 մետր է, հասել են արդեն գմբեթին:

Նշենք, որ Շիրակի մարզպետն առաջին անգամ էր պաշտոնական այցով Ուլյանովսկում, տպավորված էր տեղի արդյունաբերական ներուժով ու ընդունելությամբ, «լիքը բարևներով ու լավ տպավորությամբ» վերադարձել էր՝ օգտվելով «Պոբեդա» ավիափոխադրող ընկերության ծառայությունից՝ փորձելու համար, թե ինչպիսին է ծառայությունը:

Մարզպետը գոհ էր թռիչքից: Նա նաև անդրադարձավ «Շիրակ» օդանավակայանի պայմաններին և նկատեց, որ դրանք էլ բավականին լավն են՝ սպասարկումը բավական քաղաքակիրթ է:

«Ջեռուցվում էր մեր օդանավակայանը, ես հույս ունեմ՝ ինչպես վրացիները Քութայիսիի օդանավակայանը կարողացան կայացնել, մենք էլ կկարողանանք Գյումրիինը կայացնել ու հաստատ կունենանք որոշակի տեղաշարժ՝ զբաղվածության առումով: Եթե այսպես գնա՝ «Պոբեդան» իր անվան տերը կլինի, մենք էլ կօգտվենք այդ հաղթանակից»,- ասաց Հովսեփ Սիմոնյանը: