Մեծ Այրումի մանկապարտեզի տնօրենը խփել է դաստիարակին ու ազատվել աշխատանքից

Լոռու մարզի Մեծ Այրում համայնքը 2016-ի հոկտեմբերի 2-ի ՏԻՄ ընտրությունների թոհուբոհից ուշքի չի գալիս: Այսօր այնտեղ իրավիճակը նույնքան լարված է, որքան նախընտրական շրջանում էր: Համայնքի ղեկավարի և ավագանու անդամ Գրիշա Գրիգորյանի միջև հետընտրական «պատերազմ է»:

Համենայն դեպս, Գրիշա Գրիգորյանի լարվածությունն այդպես է որակում համայնքի ղեկավարը:

Նկատենք, որ Գրիգորյանն ահազանգել է այն մասին, թե 2012 թվականից գյուղապետի աթոռն ստանձնած երիտասարդ գյուղապետը չարաշահում է իր դիրքերը: Նա, մասնավորապես, նկատել է, որ գյուղապետն աշխատանքից ազատել է մանկապարտեզի երիտասարդ, բարձրագույնավարտ տնօրենին և նրա փոխարեն նշանակել իր թոշակի անցած մորը: Եվ ընդհանրապես, նա նշել է, որ Սահակ Նազարյանը պաշտոնները մեջ-մեջ է անում իր բոլոր ազգականներին:

«Դա իրականությանը չի համապատասխանում»,- պարզաբանելով իր դեմ արված հայտարարությունները՝ NEWSPRESS.am-ի հետ զրույցում ասաց Սահակ Նազարյանը:

Նա նկատեց, որ երեք տարուց քիչ ավելի է, ինչ մանկապարտեզի տնօրենն իր պաշտոնում է, բայց իր աշխատանքին չէր համապատասխանում ու հիմա ազատվել է իր դիմումի համաձայն: Ինչ վերաբերում է իր մորը՝ Էմմա Վարդումյանին, ապա նա տնօրենի ժամանակավոր պաշտոնակատար է, երկու ամիս փորձաշրջան պետք է անցնի, որից հետո, հարմար թեկնածուի դեպքում, տնօրեն կնշանակվի: Սակայն մյուս կողմից էլ գյուղապետը նկատում է, որ մանկապարտեզի ճակատագիրն անորոշ է:

«Այսօր մանկապարտեզը ժամանակավոր փակ է, քանի որ ջեռուցում չենք կարողանում ապահովել, ու մինչև ձմռան ավարտ հազիվ թե բացվի: Երեխաների թիվն էլ չի անցնում 25-ից, այնպես որ՝ այսօր նույնիսկ մանկապարտեզի փակման հարց է դրված: Ինչ վերաբերում է նախկին տնօրենին, նա ինքն է իր կամքով դիմում գրել, նրան ոչ-ոք չի ստիպել, ուղղակի ինքը չէր կարող աշխատել, քանի որ այդ պաշտոնում համապատասխան չէր»,- ասաց գյուղապետը՝ խուսափելով փակագծերը բացելուց: Սակայն նրան ուղղված մի շարք հարցերից հետո վերջապես բորբոքված ասաց.

«Էդ որ Գրիշան ասում էր՝ լավ, բարձրագույն ավարտ աղջիկ ա, բա ինչի՞ չէր ասում, որ էդ լավ աղջիկը ծեծել ա դաստիարակչուհուն, խփել ա իրա աշխատողին… գնացինք, հարթեցինք, որ թշնամի չդառնան. այ դրա համար ա ազատվել, ոչ թե իմ մորը նշանակելու, ու հիմա էս պահին հարմար թեկնածու չկա, իմ մայրը ժամանակավոր նշանակվել ա, մինչև մանկապարտեզի հարցը լուծենք»,- բացատրեց գյուղապետը՝ այլևս չանդրադառնալով «մանկավարժական ծեծկռտուքի» դեպքի հետ կապված մանրամասներին:

Սահակ Նազարյանը չի հասկանում, թե Գրիշա Գրիգորյանն ինչից է նեղացած: Ըստ նրա՝ դա հետընտրական լարվածություն է: Նա հերքում է նաև, որ իր կինը Մեծ Այրումի մշակույթի տան տնօրեն է նշանակված: Գյուղապետի խոսքով՝ մշակույթի տուն գոյություն չունի ո՛չ որպես այդպիսին, ո՛չ էլ փաստաթղթով:

«Ախր մենք ընդհանրապես մշակույթի տուն չունենք, շենքը քանդված ա, չի աշխատում, ո՞նց կարող ա կինս տնօրեն լինի: Իմ կինն ընդհանրապես մեկ այլ տեղ հաստիքով ձևակերպված հաշվապահ է ու նույնիսկ գլխավոր էլ չէ, այլ օգնական…»,- վրդովված ասում է տնօրենը:

Ինչ վերաբերում է Նազարյանի եղբոր՝ Տիգրան Նազարյանի հետ կապված հայտարարություններին, ապա գյուղապետը նշում է, որ այո՛, եղբայրը կոոպերատիվի շրջանակում ձևավորված «Սառնարանային տնտեսության» ղեկավարն է, բայց ոչ թե ինքն է նշանակել նրան, այլ կոոպերատիվի անդամներն են ընտրել: Ի վերջո, դա չվարձատրվող աշխատանք է:

«Բա Գրիգորյանը չի՞ ասել, որ էդ շենքը քանդված էր ու զուգարան էր դարձել, մաքրեցինք, սարքեցինք, տվեցինք կոոպերատիվին: Որ կիլոմետրով ոռոգման ցանց եմ կառուցել, որ էլի շատ խնդիրներ են լուծվել, որ եկել եմ նստել քանդված գեղի վրա ու քարը քարի վրա դրել, բա դրա մասին ինչո՞ւ չեն ասում…»,- նեղսրտած ասաց գյուղապետը:

Անդրադառնալով անորակ ցորեն բաժանելու մասին հայտարարությանը՝ գյուղապետը նկատում է. «Անամոթաբար ասում է՝ ցորենը չի ծլել… եկել նայել են՝ մեր գյուղը ցորենի 99 տոկոս ծլողունակություն է ապահովել…»,-ասում է գյուղապետն ու հավելում, որ զայրացած ու վրդովված է շատ, քանի որ այս հայտարարությունների մեջ միտում է տեսնում: Նա նկատեց նաև, որ թեմայի շուրջ պարզաբանումներ տալու, իր և իր ընտանիքի հասցեին ուղղված զրպարտությունները հերքելու և մեկընդմիշտ այս հարցը փակելու համար՝ որոշել է նաև մամուլի ասուլիս հրավիրել: