Գուցե այդ 4-ի բացահայտումն ավելի ցավոտ լինի այն մարդկանց համար, ովքեր ուզում են բացահայտել նրանց. Մ.Ասլանյան

Ես իմ կողմից անում են այն, ինչը սահմանված է օրենքով, ինչը թելադրում է բարոյականությունն ու բանականությունս, բայց կան հարցեր, որոնք ինձ պետք է չուղղեք, քանի որ դրանք ինձ չեն վերաբերվում:

Պաշտոնավարման 100 օրվա առիթով կազմակերպված մամուլի ասուլիսին հայտարարեց Վանաձորի քաղաքապետ Մամիկոն Ասլանյանը՝ պատասխանելով հարցին, թե ինչո՞ւ են ավագանու ընդդիմադիր անդամները բոյկոտում նիստերը: Քաղաքապետը նկատեց, որ չունի այդ հարցի պատասխանը, քանի որ բոյկոտի տրամաբանությունն էլ չի տեսնում:

«Տեղի է ունեցել օրինական ճանապարհով ընտրություն, այս դահիլճում բոլոր ներկաների, ԶԼՄ-երի և տասնյակ հազարավոր քաղաքացիների աչքի առաջ, ովքեր այդ պահին ուղիղ կապի միջոցով հետևում էին ընտրության ընթացքին: Չի խախտվել օրենքի որևէ տարր: Էդ նույն հաջողությամբ կարող ենք ասել, որ ընդդիմադիր ուժերն իրենց ձեռքի տակ ունեցած ցուցակներով ասեն, թե օրինակ Վանաձորում 50+1 ձայն ունեն, հետո այդքան ձայն չհավաքեն ու նույն ցուցակներով ընկենն տնետուն, փնտրեն նրանց, ովքեր իրենց օգտին չեն քվեարկել: Դա նույնն է՝ ինչը փոքր առումով պահանջում են հիմա»,-ասաց Մամիկոն Ասլանյանը:

Այն որ սահմանադրությունը նախատեսել է փակ քվեարկություն, ըստ քաղաքպետի, ունի իր իրավական նշանակությունն ու հետևանքը, և այնպես չէ, որ այդ կարգը նոր սահմանվեց՝ ընտրությունից առաջ:

Նա նույն տրամաբանության մեջ համեմատական է անցկացնում խորհրդարանական քվերակությունների հետ: Նա նկատում է, որ ՀՀԿ-ն ունի 70 պատգամավոր, բայց ներկայացված օրինագծին կողմ են քվերակում ենթադրենք 103 պատգամավոր. «ի՞նչ է, մենք հետ դառնանք ու ասենք մնացած 33-ը խախտե՞լ են իրենց պայմանավորվածությունը դաշինքն կազմելու մեջ»,-ասում է Ասլանյանն ու հավելում. «Էսօր որքանո՞վ է առօրեական չարչրկել, կամ թմբկահարել այդ հարցն ու առկախված թողնել Վանաձորի ապագայի հարցը»:
Մամիկոն Ասլանյանի խոսքով՝ այսօր նոր ընտրական պրոցեսներ են սկսվում, նորից ուժերը մտնելու են ընտրապայքարի մեջ, և չեն կարող անընդհատ գտնվել ընտրական պրոցեսների մեջ: Հատկապես որ Վանաձորն ունի այսօր բավականին մեծ խնդիրներ, որոնք լուծել է հարկավոր՝ դա նաև ավագանու խնդիրն է:

«Եթե ասում են Վանաձորի քաղաքապետը պարտավոր է, պետք է նայեն նաև հարցին մյուս կողմից, և ասեն, որ ավագանին էլ է պարտավոր»,-նկատում է քաղաքապետը:

Լրագրողի դիտարկմանը, թե ՀՀԿ-ի ճնշումների ներքո են ընդդիմադիր անդամները ընտրել քաղաքապետին, Ասլանյանը պատասխանեց. «Եթե ճնշումների ներքո են ընտրել, բա ինչո՞ւ նույն ճնշման ներքո չեն գալիս նիստերին»:

Թե ովքեր իր օգտին քվեարկած 4 ընդդիմադիր անդամները, քաղաքապետը չգիտի:

«Ես չունեմ այդ չորսի անունները, դուք ունե՞ք»,- դիմեց նա լրագրողին, ապա հավելեց. «գուցե այդ չորսի բացահայտումը ավելի ցավոտ լինի այն մարդկանց համար ովքեր ուզում են բացահայտել նրանց»: