Մենք վարչապետի հետ ավագանու հարց չենք քննարկել, կան ավելի կարևոր հարցեր

Վանաձորի քաղաքապետ Մամիկոն Ասլանյանը վարչապետ Կարեն Կարապետյանի հետ չի քննարկել ավագանին լուծարելու ընդդիմադիրների դիմումը: Պատասխանելով լրագրողների հարցին՝ այդ մասին նա ասաց իր պաշտոնավարման 100-րդ օրվա կապակցությամբ հրավիրված մամուլի ասուլիսի ժամանակ:

«Մենք վարչապետի հետ ավագանու հարցը չենք քննարկել: Քննարկել ենք ավելի կարևոր հարցեր՝ կապված քաղաքի ապագայի, քաղաքի զարգացման հեռանկարների, Վանաձոր քաղաքում ներդրումային մեծ ծրագրերի հետ, որը կարծում եմ շատ ավելի առարկայական է: Հարցը չի վերաբերվում միայն 5 տարի պաշտոնավարող քաղաքապետին, այլ վերաբերվում է ամբողջ Վանաձոր քաղաքի ապագային»,-ասել է քաղաքապետը:

Նա նկատեց, որ վարչապետն իրավաբան չէ, իսկ հարցը գտնվում է իրավաբանների տիրույթում, և սահմանված ժամկետում իրավաբանները կարձագանքեն:

Նա նշեց հարցի լուծման իր տարբերակը:

«Ավագանու մեր այն սիրելի գործընկերները, ովքեր քարոզարշավի ընթացքում, թմբկահարում էին Վանաձորի մասին իրենց մտահոգությունը, ովքեր ասում էին, որ ցանկացած պարագայում իրենք Վանաձորի ու վանաձորցու կողքին են, ովքեր հայտարարեցին, որ անկախ ընտրությունների արդյունքից, պատրաստ են առողջ մթնոլորտում շարունակել աշխատել, ու միասին կերտել Վանաձորի ապագան, այդ անելու փոխարեն այժմ զբաղված են բոյկոտով»,-ասաց Մամիկոն Ասլանյանը: Նա հույս հայտնեց, որ այդ մարդկանց մոտ դարձյալ կարթնանա Վանաձորի հանդեպ սերը, և իրենք կհայտնվեն նիստերի դահլիճում, որտեղ կշարունակեն աշխատել: