Իրակա՞ն, թե՞ ձևական. կրճատումները Գյումրիի քաղաքապետարանում շարունակվելու են

Հոկտեմբերի 2-ի ՏԻՄ ընտրություններից հետո Գյումրիի քաղաքապետ Սամվել Բալասանյանն ավագանուն ներկայացրեց առաջարկություն՝ կրճատել 38 հաստիք (2 հայեցողական պաշտոն, 17 համայնքային ծառայողի հաստիք, 19 հաստիք` տեխսպասարկման անձնակազմից), կրճատման արդյունքում քաղաքապետարանը խնայելու է 28 մլն 35 հազար դրամ: Ավագանին հաստատեց առաջարկը, բայց մինչ ավագանու ներկայացնելն արդեն աշխատողների մեծ մասին աշխատանքից ազատման ծանուցագրերով տեղեկացրել էին սպասվող կրճատման մասին:

Մոտ երկու ամիս աշխատողների մեծ մասը տեղյակ չէր, թե ում են ազատելու աշխատանքից: Լուրեր էին շրջանառվում, որ քաղաքապետը որոշել է աշխատանքից զրկել նրանց, ովքեր ընտրություններին «իր համար չեն աշխատել»:

Ավագանու կայացրած որոշումը պետք է հաստատեր նաև Տարածքային կառավարման նախարարությունը: Դեկտեմբերի 21-ին նախարարի հրամանը քաղաքապետարանն արդեն ստացել էր, բայց նորից անորոշ էր շատ աշխատակիցների հետագա գործունեությունը:

NEWSPRESS.am-ի թղթակցի հետ զրույցում Գյումրիի քաղաքապետարանի աշխատակազմի քարտուղար Ռոբերտ Ասատրյանը պարզաբանել է, որ կրճատվել է 38 միավոր հաստիք, 2 հայեցողական պաշտոն՝ քաղաքապետի երկու խորհրդական, 19-ը՝ տեխսպասարկման անձնակազմից և 17 համայնքային ծառայող: «Բայց դա չի նշանակում, թե 17 մարդու կրճատել ենք, կոնկրետ ֆիզիկական անձանց թիվը, ում կրճատել ենք, հասնում է 5-6-ի, մնացածը թափուր հաստիքներ են եղել»:

Փաստորեն, ստացվում է՝ Գյումրիի քաղաքապետարանում ենթադրյալ աշխատողների կրճատում է կատարվել ու, ինչպես հավաստեց պատասխանատուն, այդ հաստիքները մի քանի տարի է՝ թափուր էին: Հարց է առաջանում՝ ինչպե՞ս գործազրկության բարձր ցուցանիշներ ունեցող Գյումրիում կարող են թափուր հաստիքներ մնալ: Աշխատակազմի քարտուղարը նշեց, որ կարիք չեն ունեցել հավելյալ աշխատողի, բացի դրանից համայնքային ծառայության մրցույթներում էլ համապատասխան մասնագետին չեն կարողացել գտնել:

Հիշեցնենք, որ Սամվել Բալասանյանը 2012 թվականին աշխատանքի անցնելուց հետո համայնքային ծառայողների մրցույթներ հայտարարեց՝ համալրելու քաղաքապետարանի աշխատողների ցանկը: Շատ գյումրեցիներ էին դիմում աշխատանք գտնելու հույսով, բայց շուտով շատերը հասկացան, որ նորից պահպանվում է աշխատանքի տեղավորման հին ու փորձված մեթոդը: Պետք է լինել կա′մ խնամի-ծանոթ-բարեկամ քաղաքապետին ու նրան մտերիմներին, կա′մ ընտրություններին ձայներ ապահովված լինել:

NEWSPRESS.am-ի թղթակիցը զրուցել է համայնքային ծառայության մրցույթներին երեք անգամ մասնակցած Կարինե Սիմոնյանի հետ. «Երեք մրցույթներին էլ գրավոր լավագույն արդյունքն եմ ապահովել, բայց բանավորի ժամանակ ինչ ուզեն, կենեն, մյուսների պատասխանները չես լսե, բայց կողքից կիմանաս` ով ինչղ է պատասխանե, ու հետո կպարզվի, օր վատ պատասխանողն է գործի ընդունվե: Հետո իմացա, օր պտի ծանոթ գտնիս, նախապես խոսաս, նոր էրթաս մրցույթին: Ասեցին` ամեն ինչ տղու (նկատի ունի քաղաքապետի որդուն՝ Միսակ Բալասանյանին-խմբ.) ձեռքն է, ով կաշխատի, ով՝ չէ: Համ էլ խո ես նախկին միլիցա չէի, օր առանց պրոբլեմի գործ տային: Ինչքան կնայեմ, քաղաքապետարանի վայթե կեսը թոշակի գնացած միլիցեքն են: Ոստիկանությունից հետո կուգան քաղաքապետարան», ասում է Կարինեն:

Ի դեպ, տիկնոջ ասածները հեռու չեն իրականությունից. կարևոր պաշտոններում նշանակված են նախկին դատախազ, ոստիկանապետ, անձնագրային բաժնի պետի տեղակալ և այլն: Փաստորեն, հենց այս հանգամանքով պայմանավորված՝ մրցույթին մասնակցելը դառնում է անիմաստ, նշենք նաև, որ մասնագետ աշխատակիցներից շատերն էլ սեփական դիմումի համաձայն «լքեցին քաղաքապետարանը»:

Նրանցից մեկը Վերահսկողության բաժնի պետն էր, որի գնալուց հետո որոշվեց, որ բաժինը լուծարվելու է: Բայց սա Ռոբերտ Ասատրյանը կապում է կառուցվածքային փոփոխությամբ, ոչ թե անձերի ու ընտրությունների հետ պայմանավորված: «Տեղի են ունեցել կառուցվածքային փոփոխություններ, երկու բաժին համայնքային գույքի հաշվառման և կառավարման բաժինը և համատիրությունների մոնիթորինգի բաժինը միավորվել են, հիմա մեկ բաժին է ու կոչվում է բնակտնտեսության և համատիրությունների համակարգման բաժին: Էդ բաժնում ավելորդ հաստիքներ դուրս են եկել: Մեկ տեղ առանց այն էլ թափուր էր: Իսկ վեահսկողության բաժինը լրիվ լուծարվել է, քանի որ նույն գործառույթը կատարում է նաև աուդիտի բաժինը»,- ասում է աշխատակազմի քարտուղարը:

Ուշագրավ է, որ 4 տարի անց միայն պարզվեց, որ նույն գործառույթը կատարող երկու բաժին կա քաղաքապետարանում:

Տարածքային կառավարման նախարարության հրամանում հաստատել են չեղած աշխատողների կրճատումներն ու հրահանգել են 2017 թվականին վերանայել հաստիքացուցակը ու նորից սեղմել այն: Այժմ Գյումրիի քաղաքապետարանում ու ենթակառուցվածքներում աշխատում է 644 աշխատող: Ու, ինչպես հավելեց Ռոբերտ Ասատրյանը, բազմակուսակցական է համակարգը. «Հանրապետական կա աշխատող, «Բարգավաճից» կա, էն բանից կա՝ էն վերափոխվածից՝ «Հայկական վերածնունդից» կա մեր մոտ աշխատող»:

Հաշվի առնելով սա՝ ենթադրելի է, որ ընտրություններից հետո հաստիքացուցակի վերանայումը կլինի անխուսափելի: