Ես հերքում եմ. Գայանե Մանուկյանն՝ ադրբեջանական կայքում տեղ գտած իր հարցազրույցի մասին

Ես ո՛չ թուրքական, ո՛չ ադրբեջանական կայքերին հարցազրույց չեմ տվել: Խոսելով ադրբեջանական haqqin.az կայքում տեղ գտած հրապարակման մասին, NEWSPRESS.am-ի հետ զրույցում ասաց usarmenianews.com-ի խմբագիր, ամերիկաբնակ Գայանե Մանուկյանը:

Հիշեցնենք, որ ավելի վաղ NEWSPRESS.am-ն անդրադարձել էր  ադրբեջանական կայքում տեղ գտած հրապարակմանը, որտեղ ներկայացված էր հարցազրույց՝ Գայանե Մանուկյանի հետ: Հարցազրույցում լրագրողը ներկայացրել է «ՀՀ ոստիկանության իրական դեմքը»:

Գայանե Մանուկյանը հերքում է՝ հարցազրույց չի տվել, իսկ թե ինչո՞ւ է նման երկխոսություն հրապարակվել կայքում՝ նա իր բացատրությունն ունի:

Բանն այն է, որ օրերս լրագրողը հրապարակել է հոդված՝ «ՀՀ ոստիկանության իրական դեմքը» վերնագրով: Հոդվածում նա հնչեցրել է քննադատական գնահատականներ՝ ուղղված ՀՀ իշխանությանն ու ոստիկանությանը: Հենց այս համատեքստում էլ Գայանե Մանուկյանը տեսնում է ադրբեջանական կայքում իր հոդվածի հայտնվելը:

«Սա առաջին անգամ չէ, որ ես անդրադառնում եմ այդ թեմային և հանդես եմ եկել սուր քննադատությամբ, ու այն, որ հարցազրույց է հայտնվել ադրբեջանական կայքում իմ մասնակցությամբ՝ կապում եմ հենց իմ նկատմամբ իրականացվող հետապնդումների հետ: Սա թիրախավորում է իմ անձի նկատմամբ: Ես գրել եմ «ՀՀ ոստիկանության իրական դեմքը» վերնագրով վերլուծական և պատահական չեմ համարում, որ այն զետեղվել էր ադրբեջանական կայքի հենց առաջին էջում: Ես էլի եմ կրկնում, որ ո՛չ թուրքական, ո՛չ ադրբեջանական կայքերի հետ ոչ մի առնչություն չունեմ ու հարցազրույց չեմ տվել: Իսկ այն ինչ արվում է, դա թիրախավորում է՝ իմ գործունեության, կայքի անաչառ ու ազատ խոսքի համար»,- ընդգծեց Գայանե Մանուկյանը: