Հայաստանում քաղաքական դաշտ չկա, կա ինտրիգների դաշտ

«Ղարաբաղ» կոմիտեի նախկին անդամ Աշոտ Մանուչարյանի դիտարկմամբ՝ Հայաստանում քաղաքական դաշտ չկա, կա ինտրիգների դաշտ:

«Այդ ինտրիգների դաշտ էլ հենց մտել է ևս մեկ ուժեղ խաղացող»,- NEWSPRESS.am-ի հետ զրույցում ասում է Աշոտ Մանուչարյանը՝ որպես խաղացող նկատի ունենալով ԲՀԿ հիմնադիր Գագիկ Ծառուկյանին:

Աշոտ Մանուչարյանի խոսքով՝ Ծառուկյանը դաշտը հարստացրեց նոր հնարավոր ինտրիգներով, իսկ ինչքան ավելանում են ինտրիգները, այնքան ժողովրդի մոտ նոր հնարավորության միտում է նկատվում. «Կարող է ճեղքում լինել»,- ասում է մեր զրուցակիցն ու ավելացնում. «Ճիշտ միտումները հայության ամբողջականությունն է, այսինքն՝ այն ծրագիրը, որ ժամանակին իրականացրել էր Ալեքսանդր Միասնիկյանը՝ բերելով էստեղ ազդեցիկ և անվանի հայերի և դրանով ոտքի կանգնեցրել երկիրը, այդ ամբողջականությունն ու ներկայացումը կարող է իրականություն դառնալ»:

Ամեն դեպքում, Աշոտ Մանուչարյանի գնահատմամբ, բուն քաղաքական դաշտը մաքուր ինտրիգային է:
«Անգամ մամուլում հրապարակված նյութերը, թե այս մեկը միավորվում է մյուսի հետ, նա՝ նրա հետ, ոչ մի նշանակություն չունեն, որովհետև առևտրի համակարգում ոչ մի պայմանավորվածություն չի գործում կամ գործում է մինչև առաջին՝ ավելի մեծ եկամուտը»,- ընդգծում է Մանուչարյանը:

Նա չի փորձում կանխատեսել, թե որ ուժերը կարող են հայտնվել խորհրդարանում՝ առաջիկա ԱԺ ընտրություններից հետո: Աշոտ Մանուչարյանի դիտարկմամբ՝ այն իրավիճակում, որում Հայաստանն է գտնվում, կարող է ցանկացած լուծում լինել, քանի որ ուժերի դասավորվածությունն ավելի շատ թելադրվելու է դրսից, քան ներսից, և դրան էլ գումարած՝ ինտրիգների շարանը:

Այնուամենայնիվ, նա հույս է հայտնում, որ ժողովրդի ամբողջականության միջոցով հարցեր լուծելու հնարավորություն դեռ կա:

«Այդ ժամանակ արդեն լուծումները լրիվ այլ կլինեն»,- ընդգծում է Մանուչարյանը: