Արթիկցի կանայք կարելու են ZARA-ի համար. կարի նոր արտադրամասում խոստանում են 400 աշխատատեղ ստեղծել (լուսանկարներ)

Երեկ Արթիկում բացվել է «Սաստեքս» տեքստիլ ֆաբրիկայի ուսումնական կենտրոնը: Երեք ամիս դասընթացներ անցնելուց հետո ներդրողները խոստանում են մոտ 400 արթիկցու աշխատելու հնարավորություն ընձեռել:

Արթիկում տեքստիլ ֆաբրիկան հիմնվելու է շվեյցարահայ գործարար Վարդան Սրմաքեշի ու Վարագյան եղբայրների աջակցությամբ, իսկ ծրագրի ղեկավարը հոլանդահայ Քրիստիան Գերիջին է, ով նպատակ ունի հայ մայրերին հնարավորություն տալ աշխատելու. «25 տարի փլուզումից հետո մեր ժողովուրդն արդեն մոռացել է աշխատելը: Ասենք՝ ձեր տղամարդիկ գնում են արտասահմաններում աշխատում են, մի երկու կոպեկ փող ուղարկում են, փորձում են դրանով յոլա գնալ: Սա սխալ է, դուք՝ որպես հայ մայրեր, դուք պիտի երկիրը կառուցեք, մայրերը պիտի կառուցեն՝ համ երեխա պիտի բերեն, համ տունը պահեք, համ էլ աշխատեք, համ էլ ամուսին պահեք»,-նշեց Քրիստիան Գերիջին, ապա պատմեց իր կյանքի պատմությունը, թե ինչպես իր մայրը կարողացել է պահել, մեծացնել զավակներին, ու հիմա էլ կարիք կա մայրերին օգնելու ու աջակցելու, քանի որ զավակին հայրենիքում պահելու մեծ առաքելությունը նրան է տրված:

«Ձեզ բացատրեմ՝ իմ մայրիկը Սասունում 5-6 երեխայով՝ մեկը փորի մեջ, իմ պապան գնացել էր Հոլանդիայում աշխատելու, ինքը՝ իր կին հալով, ամբողջ ընտանիքը պահեց: Ու չթողեց, որ որևէ մի երեխա ոչ մի տեղ գնա, Սասունի հողի վրա պահեց: Ու մեզ սովորեցրեց՝ պիտի պայքարես էդ հողի ու ջրի համար: Խեղճ հայրերը գնում են՝ երկու կոպեկ բերելու, բայց մայրը պիտի երեխա դաստիարակի ու տունը լցնի երեխաներով, ոչ թե պիտի ասի՝ իմ ֆիզիկականը, իմ մարմինը, պիտի աշխատի երկու-երեք դաշտում: Ես 9-րդ տարին է, ինչ Հայաստանում եմ ու 9 երեխա ունեմ: Ես 1993 թվականին եկել եմ, մութ տարիներին էստեղ եմ եղել, պատերազմ, ամեն ինչ տեսել եմ, ապրել եմ: Դրա համար եմ ասում՝ եկել եմ ձեր հետ տանջվելու: Իրար հետ պիտի կառուցենք»,- հավելեց ծրագրի ղեկավարը:

Այս կարի արտադրամասը Շիրակի մարզում կառուցվող երրորդ ֆաբրիկան է՝ Ամասիայից ու Գյումրիից հետո: Առայժմ անհայտ է, թե որտեղ կկառուցվի Արթիկի ֆաբրիկան, դեռ կառույցի փնտրտուքների մեջ են: NEWSPRESS.am-ի թղթակցի այն հարցին, թե ինչո՞ւ են հիմնական ներդրումները կատարվում Շիրակի մարզում, Քրիստիան Գելեջին պատասխանեց, որ դեռ խորհրդային տարիներից Շիրակի մարզը եղել է տեքստիլ արդյունաբերության կենտրոն, ու փորձելու են դա վերականգնել, հենց այս տարածաշրջանում մեծ ներուժ կա, հատկապես՝ Արթիկում, ի տարբերություն Ամասիայի, որտեղ աշխատակիցների թիվը 100 հոգուց չի անցնում, միայն Արթիկից 895 հոգի աշխատելու համար արդեն հերթագրվել է՝ չհաշված հարակից գյուղերի բնակիչները:

«Մեծ գործարան ենք կառուցելու, որտեղ աշխատելու է 350-400 մարդ, իսկ շուկան 80 տոկոսով լինելու է Եվրոպայում: Արթիկում մենք նպատակ ունենք երկու գործարան դնել, մեկում արտադրելու ենք բանվորական շորեր, երկրորդ գործարանն ուզում ենք սարքել, որ տրիկոտաժի վրա խորանանք, արտադրենք տաբատներ «Զառայի» համար: Մինիմում աշխատավարձը 55 հազար դրամ է, մենք տալիս ենք գործարքային, ով ինչքան արտադրի, այն էլ կստանա»,- ասաց Քրիստիան Գերիջին:

Բացման արարողությանը ներկա էր նաև «Ռենա» ՍՊԸ տնօրենը, ով պատրաստվում է ստեղծել հայ-իրանական գորգագործության կենտրոն: Նա ցանկանում է հայկական գորգերի արտադրություն հիմնել: NEWSPRESS.am-ի թղթակիցը հետաքրքվեց, թե արդյոք հայկական գորգը պահանջարկ ունի՞, Ռեզա Նաֆեզիին պատասխանեց. «Արտասահմանում պահանջարկը մեծ է, ամենաէժան գորգն արժե մոտ 2000 դոլար: Ուզում ենք վերականգնել խալիի գործը, հայկական խալին աշխարհում շատ անուն ունի, ցավոք, հիմա վարի գնում է, մենք ուզում ենք Արթիկում թելերը բաժանենք ժողովրդին, խալի գործենք: Մենք տեսել ենք, հայկական խալի՝ 280.000 դոլար արժե, ու գնող շատ կա»: