Ապրիլյան պատերազմում զոհված Մերուժան Ստեփանյանի տարեդարձը ծնողները նշել են երեխաների խնամքի տանը (լուսանկարներ)

Ապրիլյան քառօրյա պատերազմում զոհված ավագ լեյտենանտ Մերուժան Ստեփանյանն այսօր կդառնար 24 տարեկան: Ծնողները որդու ծննդյան օրը ոչ միայն իրենց հարգանքի տուրքն են մատուցել նրա շիրմաքարի մոտ, նաև որոշել են որդու ծննդյան տարեդարձը նշել Ֆ. Նանսենի անվան երեխաների խնամքի կենտրոնում:

Հիշեցնենք, որ Արցախի սահմանները պաշտպանելիս թշնամու գնդակի զոհ դարձած 23-ամյա գյումրեցի երիտասարդը Վազգեն Սարգսյանի անվան ռազմական ինստիտուտն ավարտելուց հետո պայմանագրային զինվորական ծառայության էր անցել Թալիշի զորամասում: Որդու մավան լուրը ծնողներն իմացել էին ապրիլի 3-ին՝ Թալիշի զորամասի հրամանատարությունից:

Մերուժանի ծնողները հուզված էին, բայց և հատուկ էին պատրաստվել որդու տարեդարձին: Հուզմունքի հետ կար նաև ներքին մի ուրախություն՝ տեսնելով, թե ինչպես երեխաների խնամքի տան սաներն աղոթում իրենց որդու համար:

«Ամիսներ առաջ՝ ապրիլին, ամբողջ մեր երկիրն էր փոթորկված, որովհետև անհանգիստ լուրեր էին գալիս սահմանից, մեր ավագ եղբայրներն իրենց կյանքով ապահովում են մեր երկրի խաղաղությունը: Այսօր Մերուժանի տարեդարձն է, ճիշտ է՝ երկրավոր տարիներ չեն ավելանալու, բայց Ձեր սրտերում է, որ իր կյանքը շարունակվելու է: Մեր քաջին շնորհավորելով՝ մաղթենք, որ Աստծո ձեռքերում խաղաղության հանգստի արժանանա, և ձեզանից յուրաքանչյուրի մեջ իր կյանքը շարունակվի»,- իր օրհնության խոսքում նշեց քահանա Տեր Գրիգորը:

«Քանի որ իմ որդին զոհվավ հանուն մեր երեխաների, մեր երկրի անառիկության ու պաշտպանության, որոշեցինք այսպես նշել նրա ծնունդը: Նա զոհվեց բոլոր մեր հայ մանուկների անվտանգ մանկության ու ապագայի համար»,- նշեց Մերուժան Ստեփանյանի հայրը՝ Արթուր Ստեփանյանը NEWSPRESS.am-ի թղթակցի հետ զրույցում: