«Վարչապետը քրեաօլիգարխիկ համակարգի զոհը դարձավ»

Հունվարի 13-ին վարչապետ Կարեն Կարապետյանն ամփոփեց իր պաշտոնավարման 100 օրը: Հրավիրված մամուլի ասուլիսի ժամանակ էլ նա հայտարարեց, թե ստվերից հսկայական մաս տեղափոխվել է սպիտակ դաշտ: Մինչդեռ կարծես նրա պաշտոնավարման օրից մինչ այսօր, բացի կառավարության դեմքերից՝ էական փոփոխություն չի եղել:

Այս դիտարկմանը համամիտ է Գերագույն խորհրդի նախկին պատգամավոր Ազատ Արշակյանը: Նա NEWSPRESS.am-ի հետ զրույցում նշեց, որ ստվերային դաշտից սպիտակ դաշտ անցնեու փոփոխություն չի նկատում: Ըստ նրա՝ ստվերից դուրս գալ, նշանակում է, որ արդարադատության նախարարությունը «ստվերում» կուտակված հարստությունը պետք է բաց դատավարությամբ սահմանված կարգով վերադարձնի պետությանը:

«Ստվերից ո՞նց են վերադարձնում սպիտակ դաշտ, այսինքն՝ էլ չե՞ն գողանում: Էդ ինչքա՞ն էին գողանում, որ հիմա էլ չեն գողանում… ստվերից սպիտակ դաշտ չեն տեղափոխվել, դա չկա, ու չեմ նկատում, չեղած բանը ո՞նց կարելի է նկատել»,- նշեց Ազատ Արշակյանը:

Նրա դիտարկմամբ՝ այսօր վարչապետը «կոշտ սահմանափակումների» առաջ է կանգնած:

«Մարդը թափով եկավ, կարծում եմ, որ պատրաստ է անելու այն, ինչ ասում է, բայց հետո արգելեցին: Ոչ միայն արգելեցին, այլև ներգրավեցին իրենց ցուցակի մեջ: Քրեաօլիգարխիկ համակարգը վարչապետին ներգրավեց իր ցուցակի մեջ, դարձրեց յուրային: Նրան ոչ միայն արգելված է, այլև նա հիմա պարտավոր է դրանով չզբաղվել, որովհետև հո իր գործընկերներին չի՞ ենթարկելու ռեպրեսիաների… Կարծում եմ, որ վերջացավ, այդ թափն անցավ, ցավալի է»,- նկատում է նախկին պատգամավորը:

Ամեն դեպքում նա հույս ունի, որ հնարավոր է՝ վարչապետը թաքնվել է, անցել է ընդհատակ՝ որպես պայքարող վարչապետ, և սպասում է հարմար պահի՝ իր գործը կատարելու: Բայց հարմար պահ երբ կլինի՝ Ազատ Արշակյանը չի կարող ասել: Նա չի բացառում, որ վարչապետը կարող է բաց թողնել այդ պահը:
«Նա խոստացել է և պետք է քրեաօլիգարխիկ համակարգի գանգամաշկը ցույց տա, բայց չի կարողանում անել»:

Ինչ վերաբերում է վարչապետի հայտարարությունը, թե օլիգարխների հետ իրեն ապահով ու հանգիստ է զգում, Ազատ Արշակյանը սարկազմ է որակում:

«Վարչապետն ուզում էր ասել, որ երկրի վարչապետը չի կարող երկիրը թալանողների հետ իրեն հանգիստ զգալ: Ի տարբերություն քրեաօլիգարխիկների՝ նա պատասխանատու է երկրում տնտեսական, քաղաքական, սոցիալական վիճակի համար: Նա դրա պատվազոհն է, վարչապետը քրեաօլիգարխիկ համակարգի զոհը դարձավ: Զոհը ո՞նց կարող է գոհ լինել իր դահիճներից. չի կարող զոհ լինել և նրանց հետ լավ զգալ…»,-պարզաբանում է նախկին քաղբանտարկյալը:

Նա արձագանքեց նաև դիտարկմանը, որ վարչապետը լրագրողների հետ զրույցում ասել է նաև, որ ԼՂ հարցում չի կայացվի որոշում, որին դեմ կլինեն Հայաստանի քաղաքացիները։ Խնդրի լուծման փոխզիջումային տարբերակի մասին էլ վարչապետն ասել է. «Նայած, թե ինչ փոխզիջման մասին է խոսքը»:

Ազատ Արշակյանի դիտարկմամբ՝ վարչապետը չի կարող այլ բան ասել, քան ասել է իր «գործատուն»՝ ՀՀԿ-ն և ՀՀԿ-ի ղեկավարը: Ըստ Արշակյանի՝ վարչապետը կաշկանդված է, թեև միևնույն ժամանակ էլ նա այստեղ խաղ է տեսնում:

«Այստեղ մի փոքր խաղ կա, որը խճճել է մեզ: Ծագումով որպես արցախցի՝ հասկանալի է, որ նա չի ցանկանա իր ծննդավայրը հանձնել օտարին: Դա է ընդամենը, նա խաղ է արել… եթե նա իր կուսակցության նման չի ասում՝ հանձնենք ու լավ ապրենք՝ հանձնելու գնով, ուրեմն նշանակում է` նա ավելի հայրենասեր է, քան իր շրջապատը»,- եզրափակեց Ազատ Արշակյանը: