Սատանի մայլեն քյանդրբազություն են անում

Երևանում այնքան ցուրտ է, որ ասում են` սատանան գնացել է ամառային հանգստի, իսկ թե առանց սատանայի ինչ է կատարվում նախընտրական Հայաստանում՝ նա կիմանա վերադառնալուց հետո:

Եվ քանի որ դաշտում ցրտահարված սատանա չկա, սատանի մայլեն քյանդրբազություն են փորձում անել՝ խառնաշփոթ ստեղծել նախընտրական գործընթացներում և այն էլ առանց սատանայի:

Նախ և առաջ` կապված է ՀՀԿ ցուցակի հետ, թե ով կգլխավորի, ով կլինի ընդհանրապես և ինչ նոր դեմքեր կհայտնվեն: Վերաձևակերպումներ են շրջանառվում, նոր անուններ, ֆիգուրների փոխատեղում, հիասթափություններ, առաջարկներ. և այս ամենն ունի իր գինը:

Ո՞ւմ է ձեռնտու, որ վարչապետին, ով քիչ թե շատ հեղինակություն է վայելում, հեղինակազրկեն, թե իբրև Սերժ Սարգսյանը դժգոհ է նրանից և որոշել է ՀՀ-ում պարտադիր 5 տարի բնակությունը մեջտեղ բերել՝ Կարեն Կարապետյանից քաղաքավարի ազատվելու համար, Նախագահին գլխի գցելու տարբերակ է:

Նշենք, որ Կարեն Կարապետյանը պատահական ֆիգուր չէ, և նրան պատահական չեն նշանակել, իսկ թե ինչու և ում է պետք քաղաքական խառնաշփոթ՝ այլ հարց է: Պարզապես սկսել են ջուր պղտորել, իսկ ինչպես հայտնի է, պղտոր ջուրը նախընտրականի համար իդեալական վիճակ է՝ շունը տիրոջը չի ճանաչում:

Եթե Նախագահը ցանկանար Կարեն Կարապետյանից ինչ-ինչ պատճառով ազատվել, ապա ավելի խելամիտ բան կմտածեր, քան 5 տարի ՀՀ-ում ապրելու պայմանը:

Ի դեպ, ՀՀԿ ցուցակներում նոր անձինք են հայտնվում՝ կասկածելի անցյալով և անհայտ ներկայով և չի բացառվում, որ նորահայտ քաղաքական գործիչները հանուն կարիերայի այլ տարբերակ չեն գտել մեկնարկի համար, քան պղտոր ցեխաջրում ձուկ որսալը: Եվ այս ամենը մինչև սատանայի վերադարձը:

NEWSPRESS.am