ԵՀՄՖ-ի նախագահությունը մտահոգված է Հայաստանում լրագրողական գործունեությանը կոպտորեն խոչընդոտելու փաստով

Եվրոպայի հայկական միությունների ֆորումի նախագահությունն արձագանքում է հայկական NEWSPRESS.am գործակալության բաց նամակին՝ կապված իշխանությունների կողմից լրագրողական գործունեությանը կոպտորեն խոչընդոտելու և ՀՀ պատկան մարմինների կողմից արդարադատության հիմնական պայմանների խախտման հետ:

ԵՀՄՖ-ի նախագահությունն ուսումնասիրել և քննարկել է նամակում ներկայացված փաստերը և գրանցել հետևյալը. ՀՀ-ում առկա արդարադատության խիստ ցածր մակարդակն անընդհատ հանդիսանում է արտերկրի հայության քննադատության թիրախ: Որքան էլ, որ նամակում ներկայացրած խայտառակ փաստը՝ մեղադրել լրագրողին իրեն դիմած քաղաքացուն ոստիկանությանը դիմելու հորդորի համար, անհնարին լինի ընկալել և հնարավոր համարել ԵՄ-ի ցանկացած երկրի պայմաններում, Հայաստանում տիրող իրավիճակում այն սովորական է: Հատկապես, երբ ուսումնասիրում եք նամակում ներկայացված փաստերը՝ հիմնված լրագրողական հետաքննության վրա, տարակուսանք եք ապրում: Եվրոպահայերի համար հատկապես անընդունելի է Գերմանիայից տարիներ շարունակ եկած օգնության վաճառքով փող աշխատելու ահավոր պրակտիկան, կոնկրետ լրագրողի կողմից ներկայացված ընկերության կողմից: ԵՀՄՖ-ն այդ հարցով խիստ հետաքրքրված է և պատրաստ է կապվելու գերմանական բարեգործական ընկերության հետ՝ պարզելու համար նրանց կողմից իրականացված բարեգործության հարցում հայկական կողմի կատարված հանցագործության մանրամասները: Փաստերի իսկությունը հաստատվելու դեպքում ԵՀՄՖ-ն կմիանա լրագրողների պահանջին, հանցագործության պարզաբանման և մեղավորներին պատժելու հարցում:

ԵՀՄՖ-ին չափազանց հետաքրքրում է նաև EU- ASIA business finance center Հոլդինգի կողմից «Նաիրիտի» վերաթողարկման հարցի շուրջ կառավարության հատուկ բացասական վերաբերմունքի շուրջ և այդ հարցի հետ կապված լրատվամիջոցների նկատմամբ ոչ բարեկամական վերաբերմունք դրսևորելու հարցում: Գուցե վերոհիշյալ ԶԼՄ-ն իր գործունեության մեջ չափազանց անկախ գործունեությամբ չի կարող լինել իշխանության սիրելին, բայց և այնպես, «Նաիրիտի» ապագայի կարևորագույն հարցում հանդուրժողականությունը չափազանց կարևոր է: Հատկապես, այս հարցում ԵՀՄՖ-ն պարտավոր է մեծ ուշադրություն ցուցաբերելու, քանի որ ԵՀՄՖ-ի նախագահ դոկտոր Աշոտ Գրիգորյանը հենց NEWSPRESS-ի կողմից կազմակերպած մամլո ասուլիսի ժամանակ խիստ քննադատության էր ենթարկել նախկին վարչապետ Տիգրան Սարգսյանին «Նաիրիտի» կազմաքանդման հարցում իշխող դիրք ունենալու և օֆշորների միջոցով կողոպուտներ կազմակերպելու հարցում:

Այս ասուլիսին հաջորդել էր Տիգրան Սարգսյանի կողմից հինգ հայկական ԶԼՄ-ների և պարոն Գրիգորյանի նկատմամ դատական բողոք ներկայացնելու զարմանալի փաստը: Զարմանալի է, քանի որ տարիներ անընդհատ Հետք լրատվական կենտրոնի կողմից հրապարկված աղաղակող փաստերի շուրջ նախկին վարչապետը չի արտահայտվել, չի հերքել և դատական գործընթացներ չի սկսել, իսկ ահա այս ասուլիսը, կարծես, վիրավորել է նրան: Շատ հետաքրքրական է լինելու այս հարցի շուրջ դատարանում նախկին վարչապետի կողմից բացատրություններ լսելը, եթե իհարկե նա մինչև վերջ կգնա ու ետ չի վերցնի դատական հայցը: ԵՀՄՖ-ի նախագահությունը հայտարարում է, որ պատրաստ է բաց նամակում արծածված բոլոր հարցերին հետամուտ լինելու, լրատվության անկախության խնդրի շուրջ միջազգային պատկան մարմինների ուշադրությունը հիավիրելու, այս աճող ու պայթյունավտանգ սկանդալը միջազգային քննության ներկայացնելու և հարցի արդարացի լուծումն ապահովելու համար:

ԵՀՄՖ-ն հետամուտ կլինի հետաքննություն անցկացնել և պարզել, թե որքանով են NEWSPRESS.am-ի գլխավոր խմբագրի՝ Արմենուհի (Արիանա) Հովսեփյանի նկատմամբ իրականացվող քաղաքական և իրավական հետապնդումները կապված կայքի գործունեության ու մասնավորապես վերոհիշյալ հրապարակումների հետ: ԵՀՄՖ-ն պատրաստ է այս հարցում իր լիազորությունների ու հնարավորությունների շրջանակում անձնապես միջամտել Արիանա Հովսեփյանի նկատմամբ անարդար դատական գործի բացահայտմանը:

Եվրոպայի հայկական միությունների ֆորումի նախագահություն

Լուսանկարում` Արմենուհի (Արիանա) Հովսեփյան