«Ես հո չեմ ընկնելու ամեն մեկի հետևից վազեմ…». վարչապետին նյարդայնացրեց բանանի ներկրման հետ կապված հարցը

«Դուք պատկերացնո՞ւմ եք՝ ես ամեն բան ներկրողի իմանամ»: Այսօր՝ հունվարի 13-ին հրավիրված մամուլի ասուլիսի ժամանակ այսպես արձագանքեց լրագրողներին հարցին վարչապետ Կարեն Կարապետյանը: Ընդհանրապես նրան ինչ-որ չափով նյարդայնացրեց բանանի ներկրման հետ կապված հարցը:
Նա վրդովված նկատեց, որ իր գործառույթն ամենևին էլ այդ բանան ներկրողին իմանալը չէ:

«Ախր, հարազատներս, սիրելիներս, պատկերացնո՞ւմ եք՝ ես ամեն բան ներկրողին իմանամ, էդ ո՞ւր կհասնի: Դուք ուզում եք բանան ներկրողին ես իմանամ, մեկ ուրիշը՝ շաքար ներկրողին, ես սաղին իմանա՞մ»,- ասաց վարչապետը՝ նեղսրտելով. «Է՜… լավ, հիմա դուք ի՞նչ եք ուզում, որ ես ասեմ»:

Հարցին, թե արդյոք ներկրողին խոչընդոտողը պատիժը կրե՞լ է, թե՞ ոչ, վարչապետը պատասխանեց, որ ինքը տեղյակ չէ:

«Ինձ համար դա կարևոր հարց է, չէ՞… Ինձ համար կարևոր է, որ էդ տենդենցը, եթե նույնիսկ եղել է, որ մեկը խոչընդոտել է, էլ չլինի: Այս պահին կա՞, չկա: Դուք ունե՞ք փաստ, որ խոչընդոտել է, բերեք, ասեք, բայց ինձ միլիցիա մի սարքեք… »,- ասաց վարչապետը:

Լրագրողների դիտարկմանը, որ դա պաշտոնական տեղեկություն է, և ՊԵԿ-ն է հայտարարել, վարչապետը ասաց. «Բանան ներկրողը բողոք ներկայացրե՞լ է, որ իրեն խոչընդոտել են… Ի՞նչ եք ուզում, ես հո չեմ ընկնելու ամեն մեկի հետևից վազեմ, ասեմ՝ ինչի՞ դիմում չես տալիս… Լավ, դուք ո՞նց եք պատկերացնում, էսօր իմ ու ձեր հանդիպումը պետք է լիներ սա՞»,- հարցրեց Կարեն Կարապետյանը: