Մեղադրանք` Գյումրիում Իտալիայի պատվո հյուպատոսին. նա խուսափե՞լ է հարկերից ու ապօրինի աշխատողներ վարձել 

Գյումրիի ժուռնալիստների «Ասպարեզ» ակումբում մամուլի ասուլիս էր հրավիրել Գյումրիում Իտալիայի պատվո հյուպատոսարանի հյուպատոսական ծրագրերի նախկին համակարգող, ռեժիսոր Արման Մազմանյանը:

Բանախոսը նախ ներկայացրեց, որ մոտ 10 տարի աշխատել է Գյումրիի Իտալիայի պատվո հյուպատոսարանում, բայց Անտոնիո Մոնտալտոն առանց հիմքերը նշելու ու խախտելով աշխատանքային օրենսգրքի մի քանի պահանջներ՝ բանավոր, առանց հրամանի ազատել է նրան աշխատանքից՝ չվճարելով մեկ ամսվա աշխատավարձն /250.000 դրամ/ ու վերջնահաշիվը: Արման Մազմանյանը դիմել է պատվո հյուպատոսին, բայց ապարդյուն: Իր պահանջն ու բողոքն Արման Մազմանյանը որոշել է վիճարկել դատական կարգով՝ պահանջելով աշխատավարձը, վերջնահաշվարկը և ազատման հրամանն ու հիմքերը, բայց հյուպատոսը դատարան չի ներկայանում:

Ասուլիսի ընթացքում Արման Մազմանյանը ներկայացրեց իր աշխատանքային գրքույկը, որտեղ հստակ գրված է, որ ընդունվել է աշխատանքի հյուպատոսարանում, առկա են Անտոնիո Մոնտալտոյի ստորագրությունն ու կնիքը: Սակայն, երբ Արման Մազմանյանն այս փաստաթուղթը ներկայացրել է դատարանին, ու դատարանը պահանջել է պարզաբանում, պատվո հյուպատոսը նիստերին չներկայանալով գրավոր պատասխանել է. «Գյումրիում կա Իտալիայի պատվո հյուպատոս, բայց գոյություն չունի պատվո հյուպատոսարան: Այդ է վկայում նաև ՀՀ արդարադատության նախարարության իրավաբանական անձանց պետական ռեգիստրի գործակալության կողմից տրված տեղեկանքն այն մասին, որ 2016թ. դեկտեմբերի 5-ի դրությամբ պետական միասնական գրանցամատյանում առկա տեղեկությունների՝ Իտալիայի պատվո հյուպատոսարան գրանցված-հաշվառված չէ: Ուստի ես՝ որպես Իտալիայի պատվո հյուպատոս, չէի կարող հանդիսանալ գործատու և արձակել հրամաններ, այդ թվում՝ աշխատանքի ընդունման և ազատման»/ մեջբերված է փաստաթղթից/:

Արման Մազմանյանը հյուպատոսի այս մեկնաբանությանը հակադարձում է՝ նշելով, որ հավաքել է մի շարք փաստեր, որոնք, ըստ նրա, ապացուցում են, որ Գյումրիում՝ Գորկու փողոց 3-րդ նրբանցք 36 տանը, տեղակայված է եղել Իտալիայի հյուպատոսարանը, նաև բոլոր այն հաղորդումներն ու ռեպորտաժներն է հավաքել, որտեղ Անտոնիո Մոնտալտոն պատմում է, թե ինչպես է եկել Գյումրի ու հյուպատոսարան ստեղծել, ծրագրերի մասին պատմել:

Արման Մազմանյանը դիմել է Շիրակի մարզի դատախազություն՝ խնդրելով պարզաբանել, թե ինչպե՞ս կարող է հյուպատոսը հրաժարվել ստորագրությունից, երբ հյուպատոսը հենց նույն ստորագրությամբ տեղեկանքներ է տրամադրել ու ինչպե՞ս է, որ Գյումրիում բոլորին հայտնի Իտալիայի հյուպատոսարանը, որի շենքի վրա մի ժամանակ փակցված էր Իտալիայի դրոշը, գրված էր՝ Իտալիայի հյուպատոսարան, հանկարծ դադարեց գոյություն ունենալ:

NEWSPRESS.am-ի թղթակիցը բանախոսից փորձել է պարզել, թե արդյոք կատարվե՞լ են սոցվճարներ 10 տարվա ընթացքում. «Ճշտել եմ, որ իմ աշխատած տասը տարվա ընթացքում ոչ մի սոցվճար չի կատարվել և հնարավոր եմ համարում, որ հյուպատոսը հենց այդ պատճառով է հերքում հյուպատոսարան ունենալու ակնհայտ փաստը, այսինքն՝ չկա կառույց, չկան հարկային պարտականություններ: Ես աշխատավարձ ստացել եմ առձեռն, իսկ 10 տարվա ընթացքում մտածել եմ, թե կատարվում են մուծումները, միայն դատական գործընթացի ժամանակ փաստաբանի օգնությամբ հարցում կատարեցինք, ու պարզվեց, որ ոչ մի մուծում կատարված չէ»:

Արման Մազմանյանը դիմել է ՀՀ նախագահին, ՀՀ արտաքին գործերի նախարարությանը, Իտալիայի արտաքին գործերի նախարարությանը, ՀՀ-ում Իտալիայի դեսպանատանը, Մարդու իրավունքների պաշտպանին, բայց այդպես էլ հստակ պատասխան չկա կամ հորդորել են դատական կարգով հարցը լուծել, կամ նշել, որ Անտոնիո Մոնտալտոն կտրամադրի բոլոր փաստաթղթերն ու աշխատավարձը, բայց 2015 թվականի սեպտեմբերից մինչ այժմ Իտալիայի պատվո հյուպատոսը չի արձագանքում ու ոչ մի պատասխան չի տվել նախկին աշխատողին:

Գյումրիում Իտալիայի պատվո հյուպատոսարանից պատասխան ստանալու հույսով այցելեցինք այն վայրը, որտեղ Իտալիայի պատվո հյուպատոսարանն էր: Դռները, սակայն, փակ էին, իսկ Իտալիայի դրոշը բացակայում էր: Պատվո հյուպատոսին հաճախ կարելի էր հանդիպել իրեն պատկանող «Վիլլա Կարս» հյուրատանը: Այստեղ դռները բաց էին, տեղեկացրին, որ Անտոնիո Մոնտալտոն Հայաստանում չէ ու միայն ամսվա վերջում կվերադառնա:

Կինոռեժիսոր Արման Մարզմանյանը ցանկանում է հրապարակայնացնել իր պահանջը, քանի որ ո′չ դատարանին, ո′չ դատախազությանը դեռ չի հաջողվում հասկանալ՝ ի վերջո Իտալիայի պատվո հյուպատոսարան կա՞, թե՞ ոչ:

Իտալիայի պատվո հյուպատոս Անտոնիո Մոնտալտոյի պարզաբանումները կլինեն հաջորդ հոդվածում: