Հանրապետությունում թունավորման դեպքեր են արձանագրվել

Հանրապետությունում թունավորման դեպքեր են արձանագրվել, որոնց հանգամանքները պարզում է ոստիկանությունը: Հունվարի 8-ին ժամը 20.30-ին, ոստիկանության Կոտայքի բաժնում հիվանդանոցից հաղորդում է ստացվել, որ «սուր էկզոգեն թունավորում շմոլ գազից» ախտորոշմամբ իրենց մոտ են տեղափոխվել Աբովյան քաղաքի բնակիչներ՝ 1967 թ. ծնված Ռաֆիկ Զ.-ն, 2004 թ. ծնված Անդրանիկ Զ.-ն և 1993 թ. ծնված Գոհարիկ Զ.-ն: Ինչպես տեղեկացնում են ՀՀ ոստիկանության հասարակայնության հետ կապերի և լրատվության վարչությունից, մեկնած օպերատիվ խումբը պարզել է, որ նույն օրը տան օդատարը փակ լինելու հետևանքով ջրատաքացուցիչի և գազի վառարանի այրված գազը տարածվել է խոհանոցում և հյուրասենյակում, ինչի հետևանքով Ռաֆիկ, Անդրանիկ և Գոհարիկ Զ.-երն իրենց վատ են զգացել ու դիմել են հիվանդանոց:

Նույն օրը ոստիկանության Դիլիջանի բաժնում հաղորդում է ստացվել հիվանդանոցից, որ «թունավորում շմոլ գազից» ախտորոշմամբ իրենց մոտ են տեղափոխվել 2010 թ. ծնված Վալերիկ Բ.-ն, 2015 թ. ծնված Մարիա Բ.-ն, 2008 թ. ծնված Քրիստինե Է.-ն, 1998 թ. ծնված Արմինե Է.-ն և 2005 թ. ծնված Արեն Է.-ն:

Մեկնած օպերատիվ խումբը պարզել է, որ նույն օրը ժամը 00.30-ի սահմաններում նշված անձինք տան գազօջախից արտանետված շմոլ գազից թունավորվել են: Վերոհիշյալ երկու դեպքերի առթիվ կատարվում է նախաքննություն:

Իսկ հունվարի 9-ին հիվանդանոցից ոստիկանության Կապանի բաժնում հաղորդում է ստացվել, որ «էկզոգեն թունավորում» ախտորոշմամբ իրենց մոտ են տեղափոխվել 1984 թ. ծնված Ալինա Ա.-ն, 2003 թ. ծնված Անդրանիկ Հ.-ն և 2006 թ. ծնված Վարդան Հ.-ն:

Պարզվել, որ նրանք թունավորումն ստացել են հունվարի 8-ին իրենց բնակարանում տարբեր սնունդներ ուտելու հետևանքով: Նշանակվել են դատաբժշկական փորձաքննություններ:

Նախապատրաստվում են նյութեր: