«Բանակ կերթան մենակ ղայդով տղեքը». ձմեռային զորակոչն սկսված է (լուսանկարներ)

Հունվարի 8-ին մեկնարկեց այս տարվա զորակոչը. պարտադիր զինվորական ծառայության մեկնեց գյումրեցի նորակոչիկների առաջին խումբը:

Չնայած ցուրտ եղանակին՝ Գյումրիի «Մայր Հայաստան» հուշահամալիրի տարածքը մարդաշատ էր, իսկ մթնոլորտը՝ ջերմ, գրկախառնություններով, բարեմաղթանքներով ու հուզմունքով լի: Ծնողներով, հեռու և մոտ բարեկամներով ճանապարհում էին որդիներին ծառայության: Այստեղ կարծես բոլորն իրար բարեկամ են, բոլորի ցանկությունը մեկն է՝ «Բարի  ծառայություն ու բարի վերադարձ նորակոչիկներին»:

Ծնողներն ու հարազատները ոգևորում էին նորակոչիկներին. «Տղես մեծցել, տղամարդ է դարձել, հբը չծառայե՞, պապան էլ է ծառայե, մեր ազգի մեջ սաղ ծառայած են, հբը ինքը չծառայե՞, տղամարդ դառնա»,- NEWSPRESS.am-ի թղթակցի հետ զրույցում նշեց նորակոչիկի հայրը:

Մայրերը հուզված էին, արցունքն աչքերին. «Հայրենիքի պարտք է, պտի ծառայե, բայց շատ կվախենամ: Ապրիլյան պատերազմից հետո շատ բան փոխվավ, մեկ կըսեմ՝ հբը օր իմ տղես չէրթա, մյուսինը չէրթա, հբը ո՞վ պտի պահե սահմանը, բայց հետն էլ շատ կվախենամ, չնայած տղես դուխով է»,- ասաց նորակոչիկ Արմանի մայր տիկին Թամարան:

Ի տարբերություն նախորդ տարիների՝ նորակոչիկների ոգևորվածությունը մեծ էր: Շատերի համար նախորդ տարվա 4 օրերը հայրենասիրության դաս էին դարձել: «Մենք չպտի նահանջենք, բանակ կերթամ դուխով, ախպերս ծառայել է, գիտեմ օր մեր թշնամին մեր դուխին չի դիմանա, սաղ տղեքն էլ պտի դուխով երթան գան», – ասաց նորակոչիկ Արսենը, իսկ Աշոտն էլ լսելով՝ ավելացրեց. «Բանակ կերթան մենակ ղայդով տղեքը»:

Բայց կային նաև այնպիսինները, ովքեր չէին կարողանում թաքցնել ներքին տագնապը. «է, զոռով կերթամ, ի՞նչ ոգևորություն, անցած տարի ինչքան տղեք հետ չեկան, հավասարություն չկա, ով փող ունի, չի երթա»:

Գյումրիի զինվորական կոմիսար, գնդապետ Գագիկ Խաչատրյանը փաստեց, որ այս զորակոչին բացականերն այնքան էլ շատ չեն, ովքեր գտնվում են Հայաստանի սահմաններից դուրս: Նույնիսկ ՌԴ-ում բնակվող 2 հայ պատանի իրենց պարտքն են համարել վերադառնալ հայրենիք ու իրենց մասնակցությունն ունենալ ՀՀ պաշտպանության գործում: Ապրիլյան քառօրյա պատերազմից հետո պատանիներն ավելի են ամրապնդվել ու ավելի նվիրումով են վերաբերվում հայրենիքի պաշտպանության գործին, այս անգամ Գյումրիից այլընտրանքային ծառայության մեկնելու ցանկություն հայտնած երիտասարդներ չկան: