Ադրբեջանի դիվերսիան Լևոն Տեր-Պետրոսյանի փոխզիջման մասին «հանճարեղ ճառի» պատասխանն էր. քաղաքագետ

Ադրբեջանական գործողությունները չափազանց համահունչ էին Լևոն Տեր-Պետրոսյանի`  Կոգրեսում հնչեցրած «հանճարեղ ճառին»: NEWSPRESS.am-ի հետ զրույցում այդ մասին ասաց քաղաքագետ Լևոն Շիրինյանը՝ անդրադառնալով հայ-ադրբեջանական սահմանին հակառակորդի կողմից իրականացված դիվերսիոն ներթափանցման փորձին, որի ժամանակ 3 հայ զինծառայող է զոհվել:  

Նրա դիտարկմամբ՝ սա Հայաստանի քաղաքական և ռազմական վերնախավի խաղաղապաշտության արդյունք է: Քաղաքագետը նկատում է, որ Հայաստանի համար զիջողականությունը բերում է զոհերի, մարդկային և բարոյական ռեսուրսների ոչնչացման, ինչի ականատեսը եղանք: Լևոն Շիրինյանը միշտ եղել ու մնում է միևնույն տեսակետին՝ այլ ճանապարհ, քան Ադրբեջանի հետ հարաբերություններում հարձակման պատրաստ լինելն է, գոյություն չունի: Հակառակը միշտ բերելու է աղետալի արդյունքների:

«Փոխզիջում են որոնում, Ադրբեջանը փոխզիջման պատասխանն է տալիս: Լևոն Տեր-Պետրոսյանը հիմա բլեֆ է անում, թե իրեն լավ չեն հասկացել: Շատ լավ ենք հասկացել: Նրա և նրա ոչ կոնգրեսական ընկերների փոխզիջումների մասին հայտարարության պատասխանը մենք ստացանք ադրբեջանցիներից: Սակայն վատն այն է, որ իրենց դիրքորոշման պատասխանն ստանում են ոչ թե հենց իրենք, այլ ժողովուրդը: Ովքեր նահանջի քաղաքականություն են վարում տասնյակ տարիներ, նրանց հարազատներին պետք է տանել դիրքեր, այն ժամանակ խելքները գլուխները կգա»,- նկատում է քաղաքագետը:

Նրանք, ովքեր մտածում են, թե միջազգային հանրությունը կարող է արձագանքել և հարցին խաղաղ ճանապարհով լուծում տալ, քաղաքագետի որակմամբ, հիպնոսի մեջ են: Նա այդ հիպնոսից առաջարկում և կոչ է անում ազատվել, քանի որ դրսից ակնկալիքներ չկան:

«Դրսից կգան օժանդակության, երբ իրենց խփենք ու քիթ-բերաններն արյուլվա անենք, իսկ այս պարագայում ոչ մի օգնություն, Բեռլինի կոնգրեսից վերցրած, Հայաստանը չի ստացել ու չի ստանալու: Հայը միշտ հաջողություն ունեցել է այն ժամանակ, երբ այդ հիպնոսից դուրս է եկել ու թքել դրսի օժանդակության վրա»,- նշում է Լևոն Շիրինյանը և հավելում, որ սա հայ-թուրքական կոնֆլիկտի դրսևորման ձև է, և չկա ուրիշ տրամաբանություն:

«Եթե կա այլ տրամաբանություն, ապա դա խեղված տրամաբանություն է»,- ընդգծում է քաղաքագետը: