«Դե թանկ ա, էլի, 25 հազար դրամը՝ էդ փոքր տոնածառի համա՞ր». եղևնի գնող ոստիկան (լուսանկարներ, տեսանյութ)

Արդեն մի քանի տարի է՝ եղևնիների բացօթյա վաճառքի համար մայրաքաղաքում հատկացվում են տարածքներ: Նախորդ տարի այդ նպատակով հատկացվել է մոտ 40 կետ:

NEWSPRESS.am-ի հետ զրույցում Երևանի քաղաքապետարանի առևտրի և սպասարկման վարչության գլխավոր մասնագետ Էդուարդ Ամիրաղյանը նշեց, որ մայրաքաղաքի տարբեր վարչական շրջաններում նույնքան վաճառակետ էլ տրամադրվել է այս տարի: 

«Էլի 40-ին մոտ կետ են տրամադրել, Մալաթիա-Սեբաստիա վարչական շրջանում այս տարի նույնիսկ ավելացրել ենք 4-5 կետ, բայց տրամադրված ոչ բոլոր կետերում է վաճառք իրականացվում: Սարյան, Բաղրամյան, Պռոշյան և Կասյան փողոցներում դարձյալ դրված են եղևնիներ, իսկ մյուս տրամադրված վաճառակետերը դատարկ են»,- ասաց վարչության գլխավոր մասնագետը՝ հավելելով, որ վաճառվող սոչիներն ու եղևնիները ներկրվում են մի քանի երկրից, այդ թվում՝ Վրաստանից և Գերմանիայից:

Թե որն է խնդիրը, որ վաճառակետերը դատարկ են, Էդուարդ Արզումանյանը չկարողացավ ասել, միայն տեղյակ էր, որ բնական եղևնու ճյուղեր կարելի է գնել՝ սկսած 5000 դրամից:

Վաճառակետերում էլ վստահեցնում են, որ բնական եղևնիները Հայաստան են ներկրվել միմիայն Գերմանիայից: Մեծ եղևնիների գները՝ կախված ճյուղերի փարթամությունից, տատանվում են 20 000-120 000 դրամի միջև:

Կասյան փողոցում ամանորյա տոները բնական եղևնիներով դիմավորելու սիրահարների թվում հանդիպեցինք նաև ոստիկանների: Նրանցից 2-ին հաջողվել էր եղևնի ձեռք բերել: Ոստիկաններից մեկը, թեմայի շուրջ նույնիսկ մեզ հետ սիրալիր զրույցի բռնվեց: Նա գոհ էր իր կատարած գնումից, թեև մեկ մետր երկարության էլ չհասնող եղևնու համար վճարել էր 25 000 դրամ, որը հանգիստ ու ազատ տեղավորվել էր նրա մեքենայի բեռնախցիկում:

«Դե թանկ ա, էլի երևի, 25 հազար դրամը, էդ փոքր տոնածառին՝ էդքա՞ն… բայց դե մի կողմից էլ երեխեքի համար ենք անում. իրենց համար թանկ չի…»,– ասաց մեր զրուցակիցը՝ հորդորելով մեզ ավելի խորանալ «եղևնուտում», քանի որ այնտեղ ավելի մեծ, գեղեցիկ, փարթամ ու հավանաբար նույնչափ էլ աչքի ընկնող «խոշոր ու փարթամ» գներով եղևնիներ կան: Իսկ, թե ո՞ւմ համար են իրականում այս եղևնիների թանկ կամ էժան, գոնե այս նախատոնական օրերին չի քննարկվում, հատկապես երբ՝ անկախ գնից, դրանք տոնական օրերից հետո հայտնվելու են աղբանոցում՝ դառնալով աղբանոց նետված գումարներ: