Որ կառույցն է վարկաբեկում պետությունը. ՄԻՊ ամփոփիչ տարեկան ելույթը՝ Գյումրիում

Այսօր մարդու իրավունքների պաշտպան Արման Թաթոյանն ամփոփել է 2016 թվականին Պաշտպանի գրասենյակի գործունեությունը: Առաջին անգամ տարեկան հաշվետու զեկույցը ոչ թե ներկայացվեց մայրաքաղաքում, այլ Գյումրիում: Հիմնավորումը մեկն էր՝ հարկավոր է օգնել մարզերին. «Մարզերին ուշադրություն դարձնելը պետք է առաջնահերթ լինի ու յուրաքանչյուրիս աշխատանքի առանցքը պետք է կազմի: Ասուլիսի անցկացման վայրն էլ ընտրել ենք Գյումրիի տեխնոլոգիական կենտրոնը: Հատուկ ենք ընտրել այս վայրը. այն ասոցացվում է մտքերի ու գաղափարների առաջընթացի հետ, ու Գյումրին այդ առաջընթացի կարևոր մասը պետք է դառնա»,- NEWSPRESS.am-ի թղթակցի փոխանցմամբ՝ նշեց Արման Թաթոյանը:

Փետրվարի 23-ից Մարդու իրավունքների պաշտպանի գործառույթն ստանձնած Արման Թաթոյանը հակիրճ ներկայացրեց Պաշտպանի գրասենյակի գործունեությունը: 2016 թվականի ընթացքում ՀՀ օմբուդսմենի գրասենյակն ստացել է մոտ 5000 դիմում-բողոք, քննարկված բողոքներով դրական լուծում է ստացել 236-ը: Այնուհետև Արման Թաթոյանը ներկայացրեց բոլոր այն ոլորտները, որտեղ ամենաշատն են խախտվում մարդու իրավունքները՝ նշելով, որ ամեն մի կառույց, որը խախտում է մարդու իրավունքները, վարկաբեկում է պետությունն ու պետության համբավը:

Պարզվեց՝ ամենաշատը քաղաքացու իրավունքները խախտվում է ոստիկանությունում՝ 625 գրավոր և բանավոր բողոք, որոնք հիմնականում վերաբերել են ոստիկանության բաժիններ քաղաքացիներին անհիմն բերման ենթարկելու, ոստիկանության բաժիններ փաստաբանների մուտքը խոչընդոտելու, հավաքների ազատության իրավունքի սահմանափակումներին:

Մարդու իրավունքների խախտումների թվով հաջորդում են քրեակատարողական հիմնարկները. 300 գրավոր և բանավոր բողոք, որոնք վերաբերում են բժշկական օգնության և պատշաճ խնամքի ապահովմանը, պատժի կրումից պայմանական վաղաժամկետ ազատելուն և այլն:

Քիչ չեն բողոքները Դատական ակտերի հարկադիր կատարման ծառայությունից, Քննչական կոմիտեից, Դատախազությունից ու Պաշտպանության նախարարությունից:

Բոլոր այս բողոքներին պաշտպանի գրասենյակն արձագանքել է, բայց դեռ Պաշտպանի որոշ գործառույթներ սահմանափակ են. Արման Թաթոյանը հույս հայտնեց, որ մարտի մեկից այլ լիազորություններ են տրվելու Մարդու իրավունքների պաշտպանին, ու պատրաստվում են մարզային կառույցներ ստեղծել, որովհետև շատ դեպքերում բողոքը դժվար է հասցնել մայրաքաղաք: