Լոռու մարզպետի խոսքի ուժը՝ վերահսկողությունից դուրս

«Եթե ես որ որևէ մեկին արգելեմ, ինքը չի կարող մասնակցել.  Ուրեմն չեմ արգելել, որ մասնակցում է»: Այսօր՝ իր տարեվերջյան ասուլիսի ժամանակ պատասխանելով լրագրողի հարցին՝ նշել է Լոռու մարզպետ Արթուր Նալբանդյանը՝ անդրադառնալով հոկտեմբերի 27-ին կայանալիք տնօրենների մրցույթին:

NEWSPRESS.am-ն ավելի վաղ անդրադարձել էր, որ Արթուր Նալբանդյանը Գուգարք համայնքի թիվ 2 հիմնական դպրոցի տնօրեն Սամվել Մացակյանին առաջարկել է դեկտեմբերի 27-ին կայանալիք դպրոցի տնօրենների մրցույթում չդնել իր թեկնածությունը: Հիշեցնենք նաև, որ մեզ հետ զրույցում տնօրենը վստահեցրել է, թե մարզպետն իրեն ասել է, որ ինքը իր «սև ցուցակում է»:

Հերքելով տնօրենի պնդումները՝  մարզպետը նկատեց, որ ինքը ոչ մեկին չի արգելել մասնակցել դպրոցի տնօրենի թափուր տեղի համար հայտարարված մրցույթին և չունի «սև ցուցակ»:

«Մենք սև ցուցակ չունենք, չենք էլ ունենալու: Դպրոցի տնօրեններն ընտրվել են մրցույթով դպրոցներում ստեղծված խորհուրդների կողմից, եւ հիմնականում բոլորի պայմանագրերի ժամկետը եղել է հինգ տարի ժամանակով: Յուրաքանչյուր դպրոցի տնօրեն պետք է հստակ հասկանա, որ 5 տարին անցնելուց հետո նոր մրցույթ է հայտարարվելու: Եվ մենք օրենքով սահմանված կարգով նոր մրցույթ ենք հայտարարել: Մենք չենք կարող ինչ-որ դպրոցի տնօրենի դժգոհության պատճառով օրենքը խախտել, ասենք՝ մրցույթ չենք հայտարարում, լավ, դու գնա, մինչեւ թոշակն աշխատի»,-ասաց Արթուր Նալբանդյանը:

Իսկ որպեսզի իր խոսքերը ավելի համոզիչ հնչեն՝ մարզպետն առաջարկեց լրագրողներին ներկա գտնվել դեկտեմբերի 27-ին կայանալիք մրցույթին:

Հ.Գ. Ամեն դեպքում, եթե մարզպետը ընդգծում է, որ «եթե արգելի, ապա…», ուրեմն պարզից էլ պարզ է, որ  Լոռու մարզում «ասող»-ը մարզպետն է, որ նա այս գործում արդեն փորձ ունի ու լինում են մարդիկ, ովքեր այնուամնեայնիվ հայտնվում են Արթուր Նալբանդյանի «սև ցուցակ»-ում, ում վրա մարզպետը «մատ է թափ տալիս» և «արգելում»… իսկ այս դեպքում արդեն ինչ-որ բան  վերահսկողությունից դուրս է եկել, ու մարզպետը չի հաշվարկել, որ Սամվել Մացակյանը կարող է բարձրաձայնել իր «սև ցուցակ»-ի  և շանտաժների մասին: