Վարչապետը խոստացել է վերականգնել օդաչուների 10 տարվա խախտված իրավունքները (տեսանյութ)

Այսօր՝ կառավարության հերթական նիստի օրը, «Հայկական ավիաուղիների»՝ հաշմանդամություն ունեցող օդաչուներն ու զոհված օդաչուների ընտանիքների անդամները դարձյալ կառավարության շենքի բակում էին: Նշենք, որ 10 տարի նրանք չեն ստացել իրենց հասանելիք գումարները:

Այս անգամ ակցիայի մասնակիցներն ավելի մեծ հույսերով էին եկել: NEWSPRESS.am-ի հետ զրույցում նրանք նկատեցին, որ վարչապետ Կարեն Կարապետյանը խոստացել է իրենց հարցին լուծում տալ: Նա հանձնարարել է ներկայացնել օդաչուների ցուցակը՝ իմանալու համար, թե քանիսն են նրանցից այսօր ողջ, և որքան է կազմում նրանց հասանելիք գումարը: Ցուցակը վարչապետին պետք է ներկայացնեն մինչև հունվարի 15-ը:

Թեհրան-Գորգան չվերթն իրականացնելիս վթարված «Յակ-40» օդանավի անձնակազմի անդամ Սարգիս Գրիգորյանի մայրը` 80-ամյա Ջեմմա Հովհաննիսյանը, արցունքների միջից նկատեց, որ ուզում է հավատալ:

«10 տարի, ամեն նիստի օր, եկել, կանգնել եմ էստեղ… ես մուրացկանություն չեմ ուզում, ես հասանելիք գումարներ եմ ուզում: Ախր եթե չէին տալու՝ թող հույսով չանեին, մենք էլ ինչ-որ կերպ մեր գլխի ճարը տեսնեինք, թե չէ էսքան տարի գալիս ենք… հաշմանդամ օդաչուների մեծ մասն արդեն մահացել է»,- ասաց Ջեմմա Հովհաննիսյանը:

Նկատենք, որ 130 օդաչուից այսօր մնացել են մոտ 70-ը. նրանցից շատերն արդեն մահացել են:

Վերջիններիս հանդիպումները նախկին վարչապետի հետ, արդյունք չեն տվել, և իրենց հասանելիք փոխհատուցումը դեռ չեն ստացել:

Հիշեցնենք, որ թե′ հաշմանդամ օդաչուներին և թե′ «Յակ-40» օդանավի անձնակազմի անդամների ընտանիքներին պետք է փոխհատուցեն «Հայկական ավիաուղիներին» պատկանող հողատարածքի վաճառքից գոյացած գումարներից: Սակայն 11 հա հողատարածքի համար արդեն 10 տարի գնորդ չի գտնվում։