Զատո մեր տոնածառն ավելի հին է, քան Ադրբեջանը. 28 աստիճան ցրտին վառվել են Գյումրիի տոնածառի լույսերը (լուսանկարներ)

Արդեն սովորության համաձայն` մայրաքաղաքի տոնածառի լույսերը վառելուց հետո վառվում են Գյումրիի տոնածառի լույսերը:

NEWSPRESS.am-ի Գյումրիի թղթակիցը հաղորդում է, որ թեև դրսում շատ ցուրտ էր, բայց շատերն էին եկել տեսնելու այս տարվա տոնածառը, որ նոր՝ 2017 թվականի տոնածառի ու Ձմեռ պապի հետ լուսանկարվեին: Բայց… տոնածառը նույնն էր մնացել, նույն «հագուկապով»: 

Գյումրիի տոնածառն ունի 28 մետր բարձրություն, սոճենու ճյուղերը բերվել են Լոռիի անտառներից: Նշենք, որ 2015 թվականի հունվարին Գյումրիի տոնածառը շրջվեց, ու դրանից հետո կառուցվեց նոր մետաղական կոնստրուկցիա, որը նույնի կրկնությունն էր, միայն, ինչպես ասում են գյումրեցիները, 2 մետրով «բոյովցավ»: Ավելացավ երեք փոքր տոնածառ, որոնք ամրանների դեր են կատարում ու պահում են մեծին, որ չտատանվի ուժեղ քամիների ժամանակ:

Այս տարի քաղաքապետարանը միայն 500,000 դրամ գումար է հատկացրել տոնածառի մետաղական կոնստրուկցիան տեղադրելու և հանելու համար, իսկ տոնածառի ու քաղաքի փողոցների զարդարանքներ չի գնել՝ օգտագործում է նախորդ տարիների ձեռքբերածը: Գյումրիի տոնական զարդուզարդարանքն էլ արժե մոտ 26 միլիոն դրամ՝ լույսեր, դեկորներ, որոնք գնվել են քաղաքի բյուջեով և գնահատվել են բավական թանկ:

Սրան ավելացրած նաև տոնական հրավառությունը, որն արժե կես միլիոն դրամ, ու ամեն տարի երկու հրավառության գումար է հատկացվում համայնքային բյուջեից: Հավելենք, որ ըստ խոսակցությունների, փողոցներում էներգիա խնայող լամպերի, տոնական լուսավորության ու հրավառության կազմակերպողն ու բիզնեսը պատկանում է քաղաքապետի որդուն:

Եթե նախորդ տարին քաղաքապետի համար նախընտրական էր, բավականին ջանացել էր ճոխ ամանորյա զարդարանքներով զարմացնել ու ուրախացնել գյումրեցիներին, այս տարի ավելի համեստ է Գյումրին: Շատ տեղերում բացակայում են նախորդ տարվա դեկորները: Օրինակ՝ նախորդ տարի համատիրություններն ամանորյա դեկորներ էին ստացել քաղաքապետարանից, որ զարդարեն շենքերի բակերը:

Այս տարի արդեն քաղաքապետ Սամվել Բալասանյանի համար հետընտրական տարի է, ու դա զգացվում է: Միայն կենտրոնական փողոցներն են տոնական տեսք ստացել: Մյուս թաղամասերում տոնական տրամադրությունը բացակայում է: Հարցին, թե ինչու է այս տարի ավելի համեստ ու տոնածառն էլ չի փոխել իր տեսքը, քաղաքապետ Սամվել Բալասանյանը պատասխանեց. «Ամեն տարի չեն կարող ճոխ զարդարել ու փոփոխել զարդարանքը»:

Իսկ գյումրեցիները կատակում էին. «Մեր տոնածառն էլ է ավանդապահ, հեչ բան չի փոխվի: Ճիշտ է` շատ սիրուն է, հլը նախկին քաղաքապետի վախտվանից էս տոնածառն է, գոնե լույսերի ձևը փոխեին, ուր խնայինք»: Մի երիտասարդ էլ լսելով խոսակցությունը՝ ավելացրեց. «Զատո մեր տոնածառն ավելի հին է, քան Ադրբեջանը»: