Աշխարհը վախենում է սատանայից, սատանան` Վիկտոր Դալլաքյանից

Վիկտոր Դալլաքյան մի ասա, մի Տորք Անգեղ ասա, մի հրաշք ծնունդ, բարեփոխիչ ու մշտապես ընդդիմադիր՝ 2016թվականից:

Մի գեղեցիկ օր պարոն Դալլաքյանն արթնացել է և լինելով երդվյալ ՀՀԿ-ական՝ որոշել է դեմ գնալ Սերժ Սարգսյանին՝ լինելով ՀՀ նախագահի աշխատակազմի ղեկավարի տեղակալը և ԱԺ-ում ՀՀ նախագահի ներկայացուցիչը:

Իսկ ի՞նչ է պատահել Վիկտոր Դալլաքյանի կյանքում, որ նա նման աշխարհասասան որոշում է կայացրել: Պարզվում է՝ ոչինչ արտառոց: Մի օր որոշել է տղամարդավարի, և տղամարդավարի իրագործել է: Գուցե որոշել են տղամարդավարի՝ իսկ նա պարզապես տղամարդավարի իրագործել է. չի բացառվում:

Նման որոշմամբ, ասում են, այն աշխարհում էլ անհանգստացած էին, բայց դե ձայն չէին հանում, մտածում էին՝ դե, Վիկտոր Դալլաքյանն է, մի օր կուղղվի: Սակայն ինչքան գնաց, իրավիճակը վատացավ, և այն աշխարհն այսօր իրական սարսափի մեջ է՝ Վիկտոր Դալլաքյանի հետագա քայլերից:

Օդից կախված լուրերի համաձայն՝ այն աշխարհում այդքան չէին անհանգստանա, եթե Դալլաքյանը Սեյրան Օհանյանի հետ չլիներ: Եթե Պաշտպանության նախկին նախարարի մասին խոսքը չլիներ՝ սատանան այդքան չէր վախենա, սակայն ունենալով պատերազմ անցած անհատին որպես վահան՝ սատանան վախից գլուխը կորցրել է:

Ասում են՝ այս քանի օրը սատանան գալու է Դալլաքյանի հետևից, նախ որպեսզի ասելն ու տանելը չմեկտեղվի, որոշել է հավաքել Դալլաքյանի բոլոր մեղքերը և օրինական կերպով տանել:

Դե Վիկտոր Դալլաքյանը 1998-2003 թթ. եղել է Հանրապետական կուսակցության անդամ, սակայն 2003-ին դուրս է եկել կուսակցությունից: Ասում են՝ այն աշխարհում դա հավասարազոր է մեղսագործության: Կասեք՝ ինչո՞ւ այն ժամանակ սատանան այդքան չէր անհանգստացել: Ասում են, որ այն ժամանակ սատանան այնքան էր շփոթված, որ շուրջ մեկ տարի տեղը չէր գտնում: Կամաց-կամաց ուշքի է եկել սատանան, և ահա՝ երկրորդ անսպասելի հարվածը: Դե սատանան էլ հո երկաթից չէ, որ Դալլաքյանն իր քաղաքական օյինբազություններով հասցնի մահվան դուռ: Սատանան որոշել է գործի անցնել Դալլաքյանի մեղքերի ողջ գունապնակով և հիմա՝ կա′մ սատանան, կա′մ Դալլաքյանը:

NEWSPRESS.am