Նարեկ Սարգսյանը ցանկանում է Քաղաքաշինության կոմիտեն տեղափոխել Գյումրի՞ ու հաշվառել տնակների թիվը

Գյումրիում հաջորդ տարվանից սկսվելու է տնակների հաշվառումը, Շիրակի մարզպետարանը հանձնարարական է ստացել հստակ թվեր ներկայացնել՝ քանի տնակ կա, քանիսն են բնակեցված ու ովքեր են ապրում այդ տնակներում:

Նշենք, որ Գյումրիում մարզպետարանն ու քաղաքապետարանը բազմիցս են փորձել տնակների հաշվառում անել, բայց այդպես էլ քաղաքի տարբեր հատվածներում գտնվող տնակների թիվն ասել չի ստացվում: Դրանց մի մասը կա′մ քանդվում է ընթացքում, կա′մ տեղափոխվում է: Տեղափոխում են հիմնականում այն տնակները, որոնց բնակիչներին պետական ծրագրով բնակարան հատկացրել են ու պարտավոր են քանդել տնակը, բայց դրա փոխարեն տեղափոխում են տնակը, իբր քանդել են ու այն տալիս վարձակալության:

Այս և այլ պատճառներով Գյումրիի տնակների քանակն իմանալ չի հաջողվում: Բայց քանի որ հաջորդ տարի կառավարությունը պաշտոնապես ավարտում է անօթևանի կարգավիճակ ունեցողների հարցը, ու բնակարանի գնման վկայականով 2017-ին նախատեսվում է պետական բյուջեից 560 մլն դրամ հատկացնել, ցանկանում է իմանալ, թե քանի ընտանիք է դեռ  մնում տնակում:

Սրանք այն ընտանիքներն են, որոնք երկրաշարժի ժամանակ, ասենք, ունեցել են 1 սենյականոց, ու ընտանիքի կազմը եղել է 3 հոգի, անցնող 28 տարվա ընթացքում երեխաներ են ունեցել, զավակները մեծացել են, ամուսնացել ու 10 և ավելի անդամ դարձել: Պետության հատկացրած մեկ սենյականոցում հազիվ մեկ ընտանիքն է տեղավորվել, մյուս մասը մնացել է տնակում:

Քաղաքաշինության կոմիտեի նախագահ Նարեկ Սարգսյանն այս խնդրին տեղյակ է ու նշում է. «Գյումրիում կա մոտ 3500 անօթևան ընտանիք, որոնք բնակարաններ չեն կորցրել երկրաշարժի հետևանքով, բայց բնակվում են տնակներում: Այդ թիվը միշտ տատանվում է, երբ այդ հաշվառումը լինի՝ կհասկանաք, թե քանի տնակ կա, դրանցից քանիսն են դատարկ, քանիսը՝ բարվոք վիճակում, ու եթե չխանգարեն գլխավոր հատակագծին և լինեն բարվոք վիճակում, կմնան որպես կացարան, իսկ մյուսների բնակարանի հարցը կլուծվի սոցիալական ծրագրերի միջոցով՝ 2018 թվականին, քանի որ լրանում է երկրաշարժի 30-րդ տարելիցը, մենք պարտավորվում ենք մինչև այդ լուծել մարզի անօթևանության խնդիրը»:

Նարեկ Սարգսյանը նաև հավելեց, որ ցավոք, Գյումրին դեռ համարվում է աղետի գոտի, ու երբ անօթևաններին բնակարանով ապահովեն վերջնականապես, դրանից հետո հարկավոր է զարգացման ծրագրեր իրականացնել:

Իսկ դրա լուծման համար Քաղաքաշինության կոմիտեի նախագահն իր տարբերակն է առաջարկում: «Պետք է Գյումրին դիտարկել որպես երկրորդ մայրաքաղաք, որովհետև նման այլ քաղաք չունենք: Պետք է մայրաքաղաքի ֆունկցիաներ կատարելու հնարավորություն տանք»:

Քաղաքի զարգացման տարբերակներից է համարում հյուպատոսարանների, համալսարանների, գերատեսչությունների տեղափոխումը: Իսկ այն հարցին, թե Քաղաքաշինության կոմիտեն պատրա՞ստ է տեղափոխվել Գյումրի, Նարեկ Սարգսյանը պատասխանեց. «Ես դեռ երկու տարի առաջ եմ առաջարկել, մեծ հաճույքով կգամ Գյումրի: Դա ինձ համար պատիվ կլինի»:

Նման առաջարկներով հանդես են եկել տարբեր պաշտոնյաներ Գյումրի այցելությունների ժամանակ: Միայն թե ամեն առաջարկի հեռանկար ավարտվում է Գյումրի-Երևան ճանապարհին, երբ պաշտոնյաները հասնում են մայրաքաղաք, արդեն տեղափոխությունը դառնում է անհնար ու ոչ իրատեսական:

NEWSPRESS.am