«Շիրակից» թռիչքներ՝ դեպի Եվրոպա՞. 8 ամիս չգործարկվող օդանավակայանի ապագան (լուսանկարներ)

Գյումրիի «Շիրակ» օդանավակայանը կառուցվել է 1961 թվականին։ Ներկայիս գործող օդանավակայանի շենքն ու վազքուղին շահագործման են հանձնվել 1982 թ.: 2007թ. ամբողջությամբ հիմնանորոգվել և ասֆալտապատվել է թռիչքուղին, կատարվել են տեղային նորոգման աշխատանքներ կառամատույցում, բերվել է վերգետնյա սպասարկման հատուկ տեխնիկա: «Շիրակ» օդանավակայանը կարող է համարվել Հայաստանի երկրորդ այլընտրանքային միջազգային օդանավակայանը/այսպես է նշված օդանավակայանի ինտերնետային կայքում/:

Բայց ի տարբերություն «Զվարթնոց» օդանավակայանի՝ այստեղ թռիչքներ շատ քիչ են։ Նախորդ տարի «Զվարթնոց» օդանավակայանով Հայաստանից մեկնել է 429 հազար ուղևոր, իսկ ժամանել՝ 410 հազարը: «Շիրակ» օդանավակայանից այս տարվա վեց ամիսներին հանրապետությունից մեկնել է 3 հազար 885 ուղևոր, իսկ վերադարձել՝ 3 հազար 120: Ուշագրավ է նաև այն փաստը, որ անցած տարվա համեմատ «Զվարթնոցի» ուղևորաշրջանառությունն այս տարվա առաջին կիսամյակի կտրվածքով աճել է շուրջ 11 հազար ուղևորով: Իսկ Գյումրիի «Շիրակ» օդանավակայանի դեպքում հակառակ երևույթն է տեղի ունեցել. ուղևորաշրջանառությունը նվազել է մոտ 60 տոկոսով: Անցած տարվա առաջին կիսամյակի արդյունքներով` «Շիրակ» օդանավակայանից օգտվել է 16 հազար 700 ուղևոր, այս տարի՝ ընդամենը 7 հազար։

Օդանավակայանը զարգացնելու ու թռիչքներ կազմակերպելու հարցը հաճախ պատճառաբանվում էր, որ օդանավակայանը չի համապատասխանում միջազգային պահանջներին, ու արդեն 8 ամիս է` չէր գործում օդանավակայանը։ Սպասարկել է միայն չարթերային որոշ չվերթներ։

Բայց չգիտես՝ ինչու ու ինչպես, առանց վերանորոգման ու այլ տեխնիկական վերազինման, «Շիրակ» օդանավակայանը դարձավ միջազգային չափորոշիչներին համապատասխան օդանավակայան։

«Պետք է հույս ունենալ, որ Գյումրիից կլինեն չվերթներ դեպի Եվրոպա, իսկ պայմանները բավականին լավն են, մենք եկել ենք տարբեր ավիաընկերությունների հետ, ուսումնասիրություններ կատարել ենք, ամեն ինչ կա այստեղ»,– ասել է«Արմենիա միջազգային օդանավակայաններ» ընկերության գլխավոր մենեջերի օգնական Անդրանիկ Շխյանը։

Հարցին, թե 8 ամիս է՝ չի գործարկվել օդանավակայանը, արդյոք կա՞ն բավարար պայմաններ ու կլինե՞ն արդյոք վերանորոգման աշխատանքներ, Շխյանը նշել է, որ ամեն ինչ կախված է նրանից, թե առաջիկայում ինչ ընկերություններ կուզենան թռիչքներ իրականացնել Գյումրիից. «Բյուջետային ավիաընկերությունների համար սա բավարար է, որովհետև ինչքան լավ են պայմանները, այնքան սպասարկման գինը կբարձրանա»։

Իսկ թե կկարողանա՞ արդյոք «Շիրակը» սպասարկել ավելի մեծ ինքնաթիռներ ու ավելի մեծ ծանրաբեռնվածությամբ աշխատել, նա հավելել է. «Իհարկե, կարող է։ Դա ապացուցեց օդանավակայանն այն ժամանակ, երբ ընդունեց Ռուսաստանի նախագահ Վ․ Պուտինին, հիմա կսկսենք ռուսական «Պոբեդա»-ի հետ համագործակցությունից»։ 

NEWSPRESS.am