«Սպայկան» «արտագաղթել է»

Հայկական «Սպայկան» մոտ 56 մլն դոլար կներդնի Հյուսիսային Օսեթիայում. խնձորի այգիներ կհիմնվեն, նաև պահեստ է կառուցվելու:

Հյուսիսային Օսեթիայի հանրապետության նախագահ Վյաչեսլավ Բիտարովի հետ հանդիպման ժամանակ «Սպայկայի» գլխավոր տնօրեն Դավիթ Ղազարյանը նշել է, որ Հայաստանում ջերմոցային արտադրության լավ փորձ կա, ընկերությունը կապահովվի 300 մշտական աշխատատեղ, լրացուցիչ կներգրավվի 700 մարդ: Նախագահը ողջունել է ներդրումների առաջարկությունը:

Այգիների մակերեսը կկազմի 1220 հա, իսկ կարգավորվող մթնոլորտով պահեստային համալիրը կզբաղեցնի 40 հազար քառ կմ:

Նշենք, որ Հայաստանում հեկտարներով հողատարածքներ անմշակ են, և շատ հաճախ միջազգային ներդրումներ են պահանջվում՝ բերք աճեցնելու համար. հաճախ այդ գումարներն անարդյունավետ են օգտագործվում՝ ծառերը չորանում են, միջազգային փորձագետներին հազարավոր դոլարներ են վճարում:

Պարզվում է՝ «Սպայկա» ընկերությունը տիրապետում է զգալի միջոցների և կարող է Հայաստանում այգիներ հիմնել, ջերմոցների տարածքներն ավելացնել՝ ստեղծելով աշխատատեղեր և զարգացնել գյուղատնտեսությունը:

Չգիտես՝ ինչու, «Սպայկան» ներդրումներ է կատարում Հյուսիսային Օսեթիայում, և այդ երկրի նախագահն ամեն կերպ աջակցում է ցանկացած ներդրողի, նաև՝ «Սպայկային»:

Եթե անգամ նման խոշոր ընկերություններ են Հայաստանից փախչում, ապա երկրի գյուղատնտեսության զարգացման համար ումից ի՞նչ պահանջեն՝ հատկապես մասնավորապես հողօգտագործողից:

NEWSPRESS.am