«Պոբեդան» թռավ` ուղևորներին թողնելով «Շիրակ» օդանավակայանում (լուսանկարներ)

Գյումրիի «Շիրակ» օդանավակայանից դեկտեմբերի 15-ին «Պոբեդա» ավիաընկերությունը մեկնարկեց Մոսկվա-Գյումրի-Մոսկվա չվերթը։

«Պոբեդա»-յի թռիչքը վերածեց մեծ արարողության։ Հնչեց Գյումրիի հիմնը: Հավանաբար ոգևորվելով տոնական մթնոլորտից Գյումրիի քաղաքապետը, պահը չկորցրեց ու որոշեց բարձրանալ ինքնաթիռ, անձամբ շնորհավորել ու բարի վայրէջք մաղթել ուղևորներին։

Թռիչքից առաջ ինքնաթիռը օրհնեց՝ 102-րդ ռուսական ռազմակայանի հրամանատարի` հավատացյալ զինծառայողների հետ աշխատանքի գծով օգնական ԱնդրեյՎաց վարդապետը, բայց նույնիսկ դա էլ զերծ չպահեց ուղևորներին անախորժ միջադեպից:

Համենայնդեպս նրանցից 10-ի համար այդպես էլ չհայտարարվեց «բարի թռիչք», քանի որ ուղևորները ուշացումով ներկայացան «Շիրակ» օդանավակայան։ Նրանք գալիս էին Վանաձորից ու դժվարանցանելի ճանապարհների պատճառով ուշացել էին: Սպասարկող անձնակազմը հրաժարվեց նրանց գրանցել: Թեև շատերը բողոքեցին ու իրենց դժգոհությունը հայտնեցին, բայց անձնակազմը մնաց անդրդվելի։ Իսկ 6 ուղևորներ էլ այդպես էլ չներկայացան։

«Զվարթնոց» և «Շիրակ» օդանավակայանների փոխտնօրեն Անդրանիկ Շուխյանը նշեց, որ «Պոբեդա»-յի մուտքը առաջին կարևոր քայլն է ապացուցելու, որ «Շիրակ» օդանավակայանը ունի բոլոր համապատասխան պայմաններն ու կարող է թռիչքներ իրականացնել։

«Առ այսօր վաճառվել է 10,000 տոմս` դեկտեմբեր, հունվար ամսվա թռիչքների բոլոր տոմսերը վաճառվել են, մնացել են միայն թանկ տոմսերը։ Իսկ 7500 դրամանոց տոմս ձեռք բերելու համար հարկավոր է լինել առաջինը ու հասցնել գնել։ Ինչ վերաբերում է ուղեբեռի տեղափոխման թանկ արժեքին, ապա հենց դրա հաշվին են նաև գումար վաստակում բյուջետային ավիաընկերությունները»- NEWSPRESS.am-ի հետ զրույցում նշեց, Պոբեդա ավիաընկերության ներկայացուցիչ Հարություն Հայրապետյանը։

Նշենք, որ «Շիրակ» օդանավակայանում կային մարդիկ, ովքեր էժան գնով էին ձեռք բերել Գյումրի-Մոսկվայի տոմսը, բայց ուղեբեռի համար բավականին գումար էին վճարել «Ըշտը, նույն գինն եղավ, վայթե բանմ էլ ավել եղավ»,-վրդովված ասաց ուղևորներից մեկը:
Մեկ այլ ուղևոր էլ նկատեց, որ Երևանից Գյումրի հասել է ավելի թանկ գնով, քան վճարել են Գյումրի-Մոսկվա թռիչքի համար։ Նաև կային այնպիսիները, ովքեր տոմսը ձեռք էին բերել 30,000 դրամով։ Մոսկվայից եկողներից մեկն էլ նշեց, որ շատ հարմար է, եթե հյուր ես գալիս մի քանի օրով ու ուղեբեռն էլ շատ չէ։

Հիշեցնենք, որ թռիչքներն իրականացվում է «Բոինգ 737» մակնիշի ինքնաթիռներով՝ շաբաթական երեք անգամ՝ երեքշաբթի, հինգշաբթի, կիրակի։ Տոմսերի վաճառքը սկսվել էր դեռ մեկ ամիս առաջ, արժեքը սկսվում էր 7500 դրամից` հասնելով մինչև 45000 դրամի։