2017-ին թոշակները չեն բարձրանա

Հայաստանում այս տարվա դեկտեմբերի 13-ի դրությամբ կենսաթոշակ ստանալու իրավունք ունի 463 հազար 838 անձ: Տարիքային կենսաթոշակ է ստանում 307 հազար 598, հաշմանդամության կենսաթոշակ` 128 հազար 377, կերակրողին կորցնելու դեպքում կենսաթոշակ` 9 հազար 972, արտոնյալ պայմաններով կենսաթոշակ` 2 հազար 541, երկարամյա ծառայության կենսաթոշակ` 740, մասնակի կենսաթոշակ` 14 հազար 610 անձ: Այս մասին  ասել է Սոցիալական ապահովության պետական ծառայության պետի տեղակալ Սմբատ Սաիյանը:

2016 թվականի հունվար-դեկտեմբերին մայրության նպաստ է նշանակվել շուրջ 26 հազար 500 անձի, իսկ երեխայի ծննդյան միանվագ նպաստ` շուրջ 41 հազար 800 անձի: 2016 թվականին ծառայության միջոցով հանրությանը վճարվել է 308 մլրդ 800 մլն դրամ:

«Հաջորդ տարվա բյուջեով ավելացումներ նախատեսված չեն, հատկացումները կլինեն 310 մլրդ դրամի չափով: Ավելացումներ չեն լինի, որովհետև 2017 թվականի համար կենսաթոշակների, նպաստների բարձրացումներ նախատեսված չեն»,- ասել է Սմբատ Սաիյանը:

Հայաստանում 2017 թվականի հունվարի 1-ից նաև շրջանառությունից դուրս են բերվում աշխատանքային գրքույկները: Ինչպես նշել է Սմբատ Սաիյանը, գործատուներն այդ աշխատանքային գրքույկները պետք է ներկայացնեն համապատասխան լիազոր մարմնին

«Լիազոր մարմինը պետք է բոլոր աշխատանքային գրքույկները սկանավորի, ներառի տեղեկատվական համակարգ: Լիազոր մարմին սահմանված է Սոցիալական ապահովության պետական ծառայությունը: Եթե մենք պատկերացնում ենք, թե ինչ ծավալների մասին է խոսքը, ապա ակնհայտ է, որ սա բավական լուրջ ծանրաբեռնվածություն է լինելու ծառայության վրա»,- ասել է նա: