Էդուարդ Շարմազանովը փորձում է «ապահովագրվել»

Երբ դու արհեստական կերպով սեղմում ես շրջանակը, միևնույն է՝ պաշտոնյան սկսում է գտնել այլ շրջանակը, թե ում անունով գրանցի իր ունեցվածքը: Նայած թե ում երևակայությունը որքան կբավարարի: Այս մասին Ազգային ժողովում ապօրինի հարստացման վերաբերյալ օրինագծի քննարկման ժամանակ ասաց Արդարադատության նախարար Արփինե Հովհաննիսյանը՝ պատասխանելով ԱԺ փոխխոսնակ Էդուարդ Շարմազանովին:

Վերջինս հավանաբար նաև իր համար «ապահովագրություն» ստանալու ակնկալիքով նախարարին հարց ուղղեց, թե ինչ վերահսկման մեխանիզմ է մշակվել այն պաշտոնյաների համար, ովքեր իրենց ունեցվածքը գրում են կնոջ, զոքանչի կամ, ասենք, հարևանի անունով:

«Ասենք X պաշտոնյայի մոտ փաստաթղթերով ամեն ինչ նորմալ է, բայց նա ունի 6 տուն՝ զոքանչի, մորաքրոջ տղայի, մորաքրոջ հարսի, իր քեռու որդու անունով. մի 25 հատ էլ տենց մեքենաներ ունի, որ իր երեխաների վրա չի գրում, գրում է հարևանի տղու և այլ մարդկանց վրա: Մենք բոլորս գիտենք, որ դա իրենն է դե ֆակտո, բայց դե յուրե իրենը չի: Ի՞նչ ենք անելու»,- հարցրեց Շարմազանովը:

Արփինե Հովհաննիսյանը նկատեց, որ փոխկապակցված անձանց շրջանակը մինչև զոքանչի մակարդակ ընդլայնելու քայլ որևէ մեկը չի արել աշխարհում. «Աշխարհի շատ երկրներ ընդլայնել են փոխկապակցված անձանց շրջանակը, մենք էլ ենք ընդլայնելու, այդ նախագիծը ներկայացվելու է: Այսինքն՝ այն մարդկանց շրջանակը, որոնց անունով կարող է գրանցել իր ունեցվածքը»,- ասաց Արփինե Հովհաննիսյանը:

Նրա խոսքով՝ չկա որևէ երկիր, որը գնացել է այդ քայլին: Նախարարը բերեց Ռումինիայի օրինակը, որը սակայն կարճ ժամանակ անց հրաժարվել է այդ քայլից:

«Երբ դու արհետսական կերպով սեղմում ես այդ շրջանակը, միևնույն է՝ պաշտոնյան սկսում է գտնել այլ շրջանակը, թե ում անունով գրանցի իր ունեցվածքը: Նայած թե ում երևակայությունը որքան կբավարարի»,- ասաց Արփինե Հովհաննիսյանը:

Ըստ նրա՝ առաջարկվող մոդելի կիրառման շրջանակում այնպես չէ, որ ամեն ինչ հրաշալի կլինի, բայց 70-80 տոկոսի դեպքում դրական արդյունք կարձանագրենք: