Վարչապետը բանանի մենաշնորհը Սամվել Ալեքսանյանի համա՞ր վերացրեց

Կարեն Կարապետյանն առաջին գործը, որ արեց վարչապետությունից հետո, մենաշնորհների վերացման ուղղությամբ աշխատանքներն էին՝ իրական կամ թվացյալ: Խոսքն առաջին հերթին բանանի մենաշնորհի մասին է, որը Միհրան Պողոսյանի կամ ԴԱՀԿ Միհրանի «Քեթրին» գրուպի մենաշնորհն էր: Նա էլ սրբորեն բանանի գինն այնպես էր պահում-պահպանում, որ կապիկների նախընտրելի միրգը համարվում է եզակի ձեռքբերում:

Վարչապետի հայտարարությունից հետո, պարզվում է՝ ինչ-որ մեկ քաղաքացի զանգահարել էր Մաքսային ծառայություն կամ էլ կառավարություն, քանի որ վարչապետը հրահանգել էր ազատականացնել պաշտոնյաների հեռախոսահամարները, և դժգոհել, որ կարողացել է բանան ներկրել, սակայն իրացման ցանցում իրեն խանգարում են. խնդիրն, իհարկե, լուծվել էր:

Եվ ահա այսօր էլ պարզվում է, որ այդ անհայտ գործարարը Սամվել Ալեքսանյանն է. նա, «չունենալով» կապեր, «չունենալով» ներկրելու հնարավորություններ, անգամ՝ իրացման ցանց՝ որոշել է օգտվել վարչապետի մենաշնորհային թուլությունից և բանան ներկրել ու յոլա գնալ, դե վարչապետն էլ օգնել է:

Երևի հանրության համար պարզ դարձավ, թե ինչու բանան ներկրելը դարձավ այսպես հեշտ. չէ՞ որ Ալեքսանյանի համար փակ դռներ չկան՝ երևի թե միայն բանանի շուկան էր, այն էլ Միհրան Պողոսյանից հետո այս շուկայի դռներն էլ են բացվել:

Կարճ ասած՝ վարչապետը Միհրանի ձեռքից բանանի ներկրումը վերցրեց Ալեքսանյանի համար:

Երևում է՝ Ալեքսանյանին վարչապետը սիրաշահում է, քանի որ վարչապետության նախաշեմին Ալեքսանյանի ոտքը թեթև տրորել էր. այն բուժելու համար բանանի մենաշնորհը կիսեցին: Մենաշնորհների հարցում բանանի շուկան ջրից ելավ, ընկավ մրջուրը: Եթե նախկինում 900 դրամ էր բանանի մեկ կգ-ն, ապա այժ 880 դրամ, և սա մեծ «առաջընթաց» է:

Վարչապետը երևի ճիշտ է արել՝ սիրաշահել է Ալեքսանյանին, քանի որ վերջինս կարող է բանանը ևս թանկացել, ասենք՝ դարձնել 1500 դրամ մեկ կգ-ն՝ այնպես, ինչպես շաքարավազը թանկացրեց 100 դրամով՝ առանց որևէ պատճառի:

Կարեն Կարապետյանը ցանկանում էր լավ լինի, սակայն Հայաստանում բարի մտադրությունները լինում են ինչպես միշտ:

NEWSPRESS.am