Ընդդիմություն լինել, չի նշանակում՝ նախագահի թշնամի լինել. Ստյոպա Սաֆարյան

Միջազգային և անվտանգության հարցերի հայկական ինստիտուտի տնօրեն Ստյոպա Սաֆարյանը ողջունում է «Հանրապետություն», «Քաղաքացիական պայմանագիր» և «Լուսավոր Հայաստան» կուսակցությունների միավորումը:

Չնայած այն բանին, որ երեկ հրապարակված հուշագրում բացակայում էր կողմերի հստակ կողմնորոշումը, որի շուրջ համախմբվել են կուսակցությունները (նրանք հավակնում էին միավորել արևմտամետ ուժերը, որոնք կունենան հստակ արտաքին քաղաքական կողմնորոշում, որն արմատապես կտարբերվի գործող իշխանության դիրքորոշումից ու կողմնորոշումից-խմբ.), սակայն Ստյոպա Սաֆարյանը NEWSPRESS.am-ի հետ զրույցում նկատեց, որ հուշագրի կետերը հստակ են և նպատակային:

«Ինձ համար միությունը նա չէ, որտեղ Սերժ Սարգսյանին հայհոում են… ընդդիմություն լինել, չի նշամնակում՝ նախագահի թշնամի լինել… երբեք նման սկզբունքով չեմ առաջնորդվել…»,-նկատեց վերլուծաբանը:

Դիտարկմանը, որ այդ 3 ուժերը ոչ վաղ անցյալում, միմյանց նկատմամբ անվստահություն էին հայտնում՝ անվանելով իրար «Սերժ Սարգսյանի հաճախորդ», Ստյոպա Սաֆարյանը նկատեց, որ դա հիմա անցյալում է, և լավ է, որ այդպես է:

«Իսկապես մի պահ կար, որ այդ կուսակցությունները ներկայացնող գործիչները մոռացել էին, որ իրենց հակառակորդը իշխանությունն է… նրանք գիտեն, թե ինչ ուղղությամբ են գործելու և ինչ գործունեություն են ծավալելու: Լավ է, որ տարաձայնություններն անցյալում են»,- ասաց վերլուծաբանը:

Անդրադառնալով կուսակցությունների կողմից ԲՀԿ-ի նկատմամբ հայտնած անվստահությանը՝ Ստյոպա Սաֆարյանն այն կարծիքը հայտնեց, որ ԲՀԿ-ն չի միանա այս դաշինքին՝ թեկուզ հենց այն բանի համար, որ իշխանամետ կողմնորոշում ունի:

«Վերջին շրջանում չի եղել առանցքային մի հարց, որտեղ ԲՀԿ-ն հակակարծիք լինի իշխանությանը՝ լինի ԵՏՄ անդամակցություն, հայ-ռուսական հարաբերություններ, թե ղարաբաղյան խնդրի կարգավորման շուրջ, ինչը չես կարող ասել այս 3 ուժերի մասին…»,-նշեց Ստյոպա Սաֆարյանը: