«Կարո՞ղ  է ասեք՝ տաշի- տուշի անենք 1 միլիոնով». Բալասանյանի համեստ Նոր տարին ու Գյումրիի 2017 թ․ բյուջեն

Գյումրիի քաղաքապետարանի ավագանու հերթական նիստին նորից բացակա էին «Բարգավաճ Հայաստան», «Հայկական Վերածնունդ» և ԳԱԼԱ կուսակցությունների ավագանու անդամները։

Բոյկոտով, բայց ընդունվեց Գյումրիի 2017 թվականի բյուջեն։ 2017 թվականին բյուջեն կազմում է 3 միլիարդ 171 միլիոն դրամ, որից 1 միլիարդ 35 միլիոնը կազմում է պետության հատկացրած դոտացիան։ Նախատեսվում է բյուջեն ծախսել քաղաքի բարեկարգման, աշխատավարձերի վճարման ու սոցիալապես կարիքավոր մարդկանց օգնություն տրամադրելու համար։

Բյուջեից ավելի՝ քաղաքապետի համար հետաքրքիր էր ամանորյա միջոցառումներին վերաբերող կետը։ Քաղաքապետարանի գլխավոր հաշվապահ Լենա Ջիլավյանը զեկուցեց, որ «տնտեսող տանտերերի նման Ամանորի միջոցառումների ծախսերը պակասեցնում ենք»:

Ըստ նրա՝ 2016 թվականին հատկացվել է 5 միլիոն 500 հազար դրամ, որը տրամադրվելու է նվերներին՝ մոտ 2400 երեխայի, սոցիալապես անապահով մարդկանց. «Հրավառության համար ենք գումար նախատեսել, իսկ լուսավորության ու քաղաքի զարդարանքի համար՝ մեկ միլիոն դրամ»,- նշեց Ջիլավյանը։

Քաղաքապետն էլ հավելեց. «Հրավառություն է լինելու երկու անգամ, շատերն ասում են՝ մեկ միլիոնանոց հրավառություն են անում, ասեմ՝ մեկը տոնածառի լույսերը վառելու ժամանակ է լինելու, մյուսը Նոր տարվա գիշերը։ Էդ տաշի-տուշիները հանել ենք։ Մենակ հյուրասիրությունը մեկ միլիոն է, էդ էլ ֆուրշետ-մուրշետն է․․․ արժանավոր մարդկանց ենք հյուրասիրելու, նվերներ տալու։ Շատ համեստ է լինելու»,- ասաց Բալասանյանն ու առաջարկեց ավագանու անդամներին․ «Կարո՞ղ է ասեք՝ տաշի- տուշի անենք 1 միլիոնով»։

Արձագանք չեղավ:

Հրավառությունները Գյումրիում դարձել են կարևոր պայման գրեթե բոլոր միջոցառումներին։ 500,000 դրամ և ավելի է գումար քաղաքային բյուջեից վճարվում է հրավառության համար։ Տարածված լուրերի համաձայն՝ հրավառությունների բիզնեսը պատկանում է քաղաքապետ Սամվել Բալասանյանի որդուն՝ Միսակ Բալասանյանին։