«Անձնական խնդիր չունեմ, պաշտոնի կարիք չունեմ, բայց…». Ծառուկյանը կվերադառնա՞ քաղաքականություն

Դեկտեմբերի 11-ին Գյումրիում էր ԲՀԿ նախկին առաջնորդը։ Գագիկ Ծառուկյանը 1988թվականի երկրաշարժի անմեղ զոհերի հիշատակը հարգելուց հետո, մեկնեց Գյումրիի «Ավտոկայան» տնակային թաղամաս, այնուհետև «Շիրակ կենտրոն» հասարակական կազմակերպություն, որը հիմնականում բարեգործների օգնությամբ բնակարանով, ֆինանսական միջոցներով ու վառելափայտով աջակցում է տնակում ապրող գյումրեցիներին։ Խոսելով «Շիրակ կենտրոնի» ղեկավարի հետ և տեսնելով, թե ինչ բազմություն էր հավաքվել ու ինչ ֆինանսական օգնություն էին խնդրում գյումրեցիները՝ Գագիկ Ծառուկյանը 10 միլիոն դրամ հատկացրեց կենտրոնի նախագահ Վահան Թումասյանին։ Զոհված զինվորների ընտանիքներին տրամադրեց 1-ական միլիոն դրամ և մեկ զոհված զինվորի ընտանիքի նվիրեց բնակարան։

Գագիկ Ծառուկյանի հետ հանդիպման էին եկել շատերը, ովքեր խնդրում էին աջակցություն։ Բայց շատերը դժգոհ էին հանդիպումից, քաշքշուկից, որ չկարողացան իրենց խնդրանքն ասել նրան․ «Ամոթ է, ամոթ, էս ինչ անշնորհք ձևով կվարվին»: Մյուսներն էլ նշում էին՝ «երկիրը թշվառության մեջ է, ինչղ ուզեն կվարվին, կվազցնեն հետևներից»։

Գագիկ Ծառուկյանը միայն հորդորում էր մոտենալ Վարդևան Գրիգորյանին՝ օգնություն ստանալու, նրան տալով 30 միլիոն դրամ՝ կարիքավորներին բաժանելու համար։

Այն հարցին, թե ինչպես է գնահատում Գյումրիի ու գյումրեցիների վիճակը, Ծառուկյանը պատասխանեց, որ այս անգամ օգնություն խնդրողները շատ էին. «Ես 30 տարի գյումրեցիների հետ կապի մեջ եմ՝ և՛ գործնական, և՛ բիզնեսի, և՛բարեկամական։ էն ժամանակ, որ գալիս էինք, եթե նոր բան դուրս եկած լիներ, առաջինը Գյումրիում էր, իրենք էլ ուրախ, զվարթ, ժպտացող, հյուրասեր: Էն ուրախ ժողովրդի այս վիճակը տեսնելով՝ ցանկացած հայրենասեր մարդ իրեն շատ վատ է զգում»։

Գագիկ Ծառուկյանի խոսքով՝ պետք է միասնական լինել, ուս-ուսի տալ, որ կարողանանք պայքարել և՛ հզոր պետության համար, և՛գործազրկության ու արտագաղթի դեմ, ոչ թե զբաղվել միմյանց նախանձելով, բամբասելով ու իրար վրա ցեխ շպրտելով։

Քաղաքականություն վերադառնալու մասին էլ ասաց, որ մոտ օրերս հայտարարություն կանի․ «Անձնական խնդիր չունեմ, պաշտոնի կարիք չունեմ, բայց կարիք ունեմ, որ իմ ժողովրդի դեմքին ժպիտ լինի, իմ ժողովուրդը երջանիկ լինի, արտագաղթ չլինի, պետությունը հզոր լինի, հզոր պետությամբ բոլոր խնդիրները կկարգավորվեն։ Այսօր Ղարաբաղի խնդիր ունենք: Տեսնելով, որ մենք հզոր ենք՝ խաղաղ բանակցային կարգով բոլոր հարցերը կարող ենք լուծել։ Նոր բաներ չեմ ասում՝ միշտ էլ ուժեղի հետ հաշվի են նստում, իսկ ուժեղ լինելը, եթե մասնատվում է, ուժեղ չեն կարող լինել, պիտի ընդհանուր գաղափարի շուրջ համախմբվելով՝ անձնականը մի կողմ դնել, լինի արդարություն, վստահություն, մրցակցություն։ Մրցակցությանը, որ տղաս էլ մասնակցի, հավասարի դեպքում հաղթանակը ես իրեն չեմ տա, հիմնականը սա պետք է լինի ժողովրդի մեջ , որ վստահությունը, հավատը վերականգնվի»,- այսպես պատճառաբանեց իր հավանական վերադարձը Գագիկ Ծառուկյանը։