«Կարեն Կարապետյանի և ՀՀԿ-ի միջև պայմանավորվածություն կա»

Իր պաշտոնավարման հենց առաջին իսկ օրերին վարչապետ Կարեն Կարապետյանը հանդես եկավ իր կոշտ ու, համենայնդեպս կառուցողական թվացող հայտարարություններով: Նա հայտարարեց նաև մենաշնորհի դեմ պայքար:

Այսօր արդեն վարչապետը հայտարարում է, թե Հայաստանում մենաշնորհ չկա: 

NEWSPRESS.am–ի հարցին, թե արդյո՞ք այս խնդիրն այսքան արագ լուծում ստացավ, քաղաքագետ Գագիկ Համբարյանը պատասխանեց, որ ինչպես նախկինում, այսօր էլ Հայաստանում մենաշնորհներ կան, և դա գաղտնիք չէ: 

«Ընդամենը երկու հոգու 1-2 կգ բանան կամ շաքարավազ ներկրելով՝ չեն կարող կտրուկ փոփոխություններ լինել՝ շուկայում մենաշնորհը թոթափելու առումով… Կարեն Կարապետյանը դեռ շատ երկար գործ ունի անելու, որպեսզի այդ մենաշնորհները վերանան… տնտեսության մեջ գոյություն ունեցող խնդիրները հենց կապված են մենաշնորհի հետ»,– ասում է Գագիկ Համբարյանը և հույս հայտնում, որ վարչապետին, այնուամենայնիվ, կհաջողվի կրճատել մենաշնորհը:

Գագիկ Համբարյանը համաձայն է վարչապետի այն դիտարկմանը, թե ՀՀԿ անդամակցությունից հետո իր վարկանիշն ընկել է. «Կարեն Կարապետյանը հեծանիվ չի հայտնաբերել. այո՛, դա համապատասխանում է իրականությանը, նրա վարկանիշն ընկել է…»:

Քաղաքագետը չի կարծում, որ ՀՀԿ-ն Կարեն Կարապետյանի վրա ճնշումներ է գործադրել կուսակցությանն անդամակցելու համար: Ըստ նրա՝ դա երկուստեք պայմանավորվածություն է: Գագիկ Համբարյանի խոսքով՝ Հանրապետականն այն եզակի ուժն է, որը 2008 թվականից ամբողջությամբ իշխանությունը պահում է իր ձեռքում, ու այսօր բավականին ցածր վարկանիշ ունի: Այժմ Կարեն Կարապետյանի ուսերին պատասխանատվություն կա, եթե նրան հաջողվեց, ապա նա կբարձրացնի ՀՀԿ-ի վարկանիշը, եթե ոչ՝ ապա կընկնի և՛ նրա, և՛ ՀՀԿ-ի առանց այդ էլ ցածր վարկանիշը: 

«Ցանկացած քաղաքական գործիչ, ով համագործակցում է ՀՀԿ-ի հետ, ունենում է վարկանիշային անկում, իսկ եթե մի քաղաքական գործչի հանձնարարվում է նման կարևոր գործ, ինչպիսին երկրի վարչապետի պաշտոնն է, ուրեմն նրա գործունեության համար պատասխանատու է ՀՀԿ-ն: Այժմ, եթե շոշափելի դրական փոփոխություններ լինեն, և որոշումները չմնան թղթի վրա, որը տարրական ուտոպիա է և հասարակությանը խաբելու միջոց է եղել մինչև հիմա, ապա ՀՀԿ-ի և Կարեն Կարապետյանի վարկանիշը կբարձրանա… բայց եթե վարչապետին չհաջողվի շոշափելի արդյունքներ գրանցել գոնե մինչև ԱԺ ընտրություններ, ապա վարկանիշի անկում տեղի կունենա…»,- ասում է քաղաքագետն ու հիշեցնում Գյումրիի ու Վանաձորի վերջին ՏԻՄ ընտրությունները, որտեղ ՀՀԿ հազիվ 31-35 % ձայն հավաքեց:

NEWSPRESS.am