«Կկզենք, կզենք, մի օր ստոյկաներս չենք կարողանա դզել». վարչապետը՝ Շիրակի մարզպետի խորհրդականին ու գյումրեցիներին

Աշխատանքային այցով Գյումրիում գտնվող վարչապետ Կարեն Կարապետյանը հանդիպել էր նաև ուսանողների հետ, որտեղ պատասխանելով ուսանողների հարցերին՝ ինքը հարց տվեց․ «Ինչպե՞ս անել, որ Գյումրին դառնա տուրիստական կենտրոն», ապա առաջարկեց մտածել այս հարցի շուրջ։

«Գյումրին ֆանտաստիկ սիրուն քաղաք է, երևի տուրիզմի տեսակետից, կլասիկ զբոսաշրջիկի համար ամենահարմար քաղաքն է։ Մոտ օրերս նաև չվերթներ է իրականացնելու «Պոբեդա» ընկերությունը Գյումրիի օդանավակայանից։ Եվ հնարավորինս ամեն ինչ պետք է անել, որ եկողը երկար մնա քաղաքում, «Պոբեդա»-ից իջնի ու չպլստա Երևան»,- հավելեց Կարեն Կարապետյանը՝ նշելով, որ պաշտոնյաներից ակնկալիքներ չունի այս հարցում, երիտասարդները կարող են նոր գաղափարներ առաջարկել. «Ես սպասում եմ Ձեր գաղափարներին, կարող եք դրա շուրջ մեզ նախաձեռնակոխ անել»։

Գյումրիում նախաձեռնություններն ու առաջարկները բազմազան էին, բայց երբ վարչապետն արդեն հորդորում էր ավարտել, խոսեց Շիրակի մարզպետի խորհրդական Հասմիկ Կիրակոսյանը. «Շիրակյան թոնրի շուրթի հացը շատ համով է, բայց երբ չի շաղախվում արվեստով, այն դառնում է վնասակար ոչ միայն ստամոքսի, նաև Ձեր ասած բիզնեսի համար»։

Նա առաջարկեց վարչապետին իր հետքը թողնել Գյումրիում, հետո միայն հեռանալ։ «Կայարանամերձ տարածքում կա հինավուրց մի շենք, մոդեռն ոճի մի շենք, որը 30-ական թվականներին է կառուցվել և կոչվում էր Սևյանի մշակույթի պալատ, նա մինչև օրս կանգնած է։ Ու ինչպես է կանգնած, գիտեմ, որ Մինասի նկարները նայած կլինեք, Մինասն ունի մի նկար, որը կոչվում է «Սպասում», այդ միմիկան շենքի դեմքին կա, եթե Դուք նայեք։ Նա սպասում է մի ձեռնբաց, մի ազգասեր, մի գյումրիասեր, մի հրաշք վարչապետի»։

Դահլիճում սկսվեցին ծափահարություններ: Տիկին Կիրակոսյանը շենքի պատմությունը ներկայացրեց, որ ԽՍՀՄ տարիներին աշխարհում առաջինը պարում էր Սևյանի պարի համույթը՝ Աղասի Շաբոյանի գլխավորությամբ, եթե Երևանում շքերթները սկսվում էին, ապա առջևից քայլում էր Լենինական քաղաքի փողային նվագախումբը։ Հասմիկ Կիրակոսյանն ասաց, որ հիմա հոգսաշատ է երկիրը, բայց «կգա պահը ու կճանաչեն այն քաղաքը, որն առաջին երաժշտական դպրոցն է ունեցել, առաջին նկարչական ստուդիան է ունեցել Անդրկովկասում, առաջին ազգային օպերան՝ «Անուշն» է բեմադրել 1912 թվականին, առաջին օրիորդաց գիմնազիան է հիմնել Հայաստանում, առաջին պետական համալսարանն է բացել․․․ Ինձ թվում է, որ հավասար աչքով պիտի նայել Հայոց աշխարհին, բայց Հայոց աշխարհում կա մի չքնաղ տարածք՝ Շիրակ աշխարհն ու հրաշք Գյումրին»։

Ի պատասխան՝ վարչապետը հավելեց. «Ես ուզում եմ, որ այդ էներգետիկայով, որ հնչեց այս առաջարկը, փոխանցվի յուրաքանչյուր գյումրեցուն, որ մենք առաջին քաղաքն ենք, ոչ թե մենք պրոբլեմի մեջ ենք, դրանից կկզենք, կկզենք, հետո ստոյկաներս չի դզվի»։

NEWSPRESS.am