Վարչապետն իրավացի է. իրոք, ինչի՞ց են հաճույք ստանում կառավարությունում

Հանրությունն արդեն հասկացել է, որ վարչապետ Կարեն Կարապետյանը սիրում է լակոնիկ և հումորով խոսել, նաև նույնն ակնկալում է խոսակցից՝ միայն լակոնիկ խոսելաոճը:

Ինչպես ասում են, այս անգամ վարչապետը մեկ քայլ առաջ է գնացել. լակոնիկ խոսելաոճից անցում է կատարել ավելի նուրբ ոլորտներ՝ գեղեցիկի զգացողությունը: Միայն թե ո′չ ՀՀ տարածքային կառավարման և զարգացման նախարար Դավիթ Լոքյանը, ո′չ Տնտեսական զարգացման և ներդրումների նախարար Սուրեն Կարայանը պատրաստ չէին, այն էլ կառավարության նիստի ժամանակ:

Վարչապետը կառավարության նիստի ժամանակ արդեն ոչ երիտասարդ նախարարներից հետաքրքրվեց, թե ինչի՞ց են հաճույք ստանում. հարցն անակնկալի բերեց նախարարներին, իհարկե, նրանք գիտեն, թե ինչից են հաճույք ստանում, սակայն, կներեք, կառավարության նիստն այն վայրը չէ, որտեղ նրանք կարող են անկեղծանալ:

Վարչապետը բավականին խորամանկ է, նա հարց տալիս է այնպիսի վայրում, որտեղ պետք է հարցին պատասխանել, իհարկե նախարարները Կարեն Կարապետյանին անկեղծ խոստովանել են, թե ինչից են հաճույք ստանում և ինչպես, սակայն կառավարության այն անդամներին, ում նման հարց չի ուղղվել, դրսևորել են հայկական չարամտություն. նրանք թույլ չեն տվել հասկանալ նախարարների պատասխանը և չարությունից սկսել են ծիծաղել:

Ու այդպես էլ մեր հարգարժան նախարարների գեղեցիկ զգացողություններին լայն հանրությունը մնացել է անտեղյակ, իսկ վարչապետը ցանկանում է յուրաքանչյուր նախարարից անկեղծություն:

Վարչապետը, ինչպես երևում է, այսքանով չի սահմանափակվի: Հաջորդ նիստին ակնկալվում է, որ Կարեն Կարապետյանը հարցնելու է, թե նախարարներն ինչպես են հաճույք ստանում, որտեղ և որ պարագայում:

Նշենք, որ դա լիովին արդարացված է և համապատասխանում է կառավարության որդեգրած քաղաքականությանը՝ զրո գաղտնիություն, առավելագույն թափանցիկություն: Վարչապետը ցանկանում է ամեն ինչ իմանալ նախարարների մասին, իսկ ինչո՞ւ ոչ, չիմանա՞, թե նախարարները ինչով են զբաղվում և ինչպես են զբաղվում:

NEWSPRESS.am