«Այո′, թասիբի խնդիր է, որ մինչև 2018թ. Գյումրիում չլինեն դոմիկներ, բայց ոչ թե մենք ենք պարտավոր, այլ ասեք՝ դուք ի՞նչ եք արել. վարչապետ

Այսօր աշխատանքային այցով Գյումրիում էր վարչապետ Կարեն Կարապետյանը, նախարարական գրեթե ողջ կազմը։ 1988թվականի երկրաշարժի անմեղ զոհերի հիշատակին հարգանքի տուրք մատուցելուց հետո, վարչապետն այցելեց Գյումրիի տեխնոլոգիական կենտրոն, որտեղ հանդիպում էր նախատեսված ուսանողների, ապա համայնքի ղեկավարների ու ֆերմերների հետ։

Նախ Շիրակի մարզպետ Հովսեփ Սիմոնյանը ելույթը ունեցավ։ Վարչապետին ներկայացրեց մարզի հիմնախնդիրները․ «Շիրակի մարզը աղքատության ցուցանիշով ամենաաղքատ մարզն է: Մեզ մոտ աղքատ է բնակչության 45 տոկոսից ավելին: 40 միլիարդ դրամ կազմել է մարզի ձեռնարկությունների ընդհանուր արտադրանքը, որը հանրապետության արտադրանքի 3 տոկոսն է»։

Հովսեփ Սիմոնյանին լսելուց հետո վարչապետը հանձնարարականներ տվեց նախարարներին, ապա սկսվեց հարց ու պատասխանը։ Հարցերը բազմազան էին, բայց Կարեն Կարապետյանին հետաքրքրում էր ոչ թե հարցը, այլ առաջարկը․ «Անցե′ք խոսքի վերջին մասին, խնդիրները չեմ ուզում լսել, ինձ հետաքրքրում է՝ դուք ի՞նչ եք արել, ասեք ի՞նչ եք առաջարկում, բիզնես պլան գրեք, ներկայացրեք»։

Շիրակի մարզում խնդիրներն ու առաջարկները բազմազան էին, ոռոգման ջրի, սպանդանոցների, երկրագիտական թանգարանին շենքի տրամադրելու մասին, այն, որ գյուղեր չեն գալիս ներդրումներ անելու, իսկ Երևանն էլ դարձել է մեգապոլիս,- «նման աննորմալ օրգանիզմի, ռախիտի նման, երբ պետության գլուխը մեծ է, մարմինը՝ փոքր, որը դառնում է ռազմավարական լուրջ խնդիր»,- խոսեց Գյումրիի քաղաքապետ Սամվել Բալասանյանը։

Վարչապետը բոլոր այս հարցերին ու ելույթներին պատասխանում էր մոտավորապես այսպես․ «Դուք պետք է գրավեք ներդրողներին, դուք պետք է գտնենք ֆինանսներ», երբեմն էլ կատակով ու գյումրեցի բարբառով էր խոսում։

Հարց-առաջարկ հնչեց նաև Գյումրիի անօթևանության խնդրի վերաբերյալ․ «Մեր թասիբի խնդիրն է, որ մինչև 2018 թվականը Գյումրիում տնակներ չլինեն, դա ոչ միայն գյումրեցու, նաև Ձեր/նկատի ուներ վարչապետին/ խնդիրն է, նույնիսկ Աֆրիկայում ապրող հայի թասիբի խնդիրն է»,- խոսեց գյումրեցի Կարեն Պետրոսյանը:

Դրան ի պատասխան՝ Կարեն Կարապետյանը նշեց. «Այո, թասիբի խնդիր է, որ մինչև 2018 թվականը Գյումրիում չլինեն դոմիկներ, բայց ոչ թե մենք պարտավոր ենք, այլ ասեք՝ դուք ինչ եք արել, մենք ինչ կարող ենք անել, մենք պարտավոր չենք»։

2017 թվականին Գյումրիում 60 ընտանիքի կտրամադրվի բնակարանի գնման վկայագիր: Սրան զուգահեռ 2017 թվականին ոչ մի պետական ծրագիր չի իրականացվի գյուղական բնակավայրերի անօթևանների համար: