Հոլդինգի առաջարկած մետաքսե ուղին մեծ աղմուկ է բարձրացրել Սլովակիայում

Դեկտեմբերի 6-ին Բրատիսլավայում «EU-ASIA Business Finance Centre» հոլդինգի և Եվրոպայի հայկական միությունների ֆորումի նախագահ Աշոտ Գրիգորյանը հանդիպեց Սլովակիայի տրանսպորտի և հեռահաղորդակցման նախագահ Արպադ Երշեկի հետ: Հանդիպման հիմնական թեման Հայաստանով անցնող և Սլովակիա հասնող «Նոր Մետաքսե ուղու» հարցի քննարկումն էր: Նախարար Արպադ Երշեկը հայտնեց, որ պարոն Աշոտ Գրիգորյանի կողմից առաջարկված այս ծրագիրը մեծ հետաքրքրություն է ներկայացնում Սլովակիայի համար, և Սլովակիայի կառավարությունը բոլոր հնարավոր միջոցներով կսատարի ծրագրի իրականացմանը:

Ըստ Գրիգորյանի՝ եթե Հայաստանում կառուցվում է Իրան-Հայաստան երկաթուղին և ավարտվում է Հյուսիս-հարավ ավտոմայրուղու կառուցապատումը, ապա Չինաստանից ապրանքի տեղափոխությունները կարող են իրականացնել Հայաստանի միջով մինչև Փոթի նավահանգիստ, այնուհետև ծով-գետ նավերով կհասցնեն Սև ծովով և Դանուբ գետով Բրատիսլավա: Հոլդինգը ցանկանում է Բրատիսլավայի նավահանգստի ղեկավարության հետ ներդրումեր անելու միջոցով նավահանգիստը վերածել եվրոպական մասշտաբով խոշորագույնի` ՀԱԲ-ի վերածելու համար: Ինչպես հայտնեց տրանսպորտի նախարար Արպադ Երշեկը, մինչև այսօր քննարկվող «Մետաքսե ուղիների» մեջ ամենակարճ և ամենաարագն անկասկած այս նոր ճանապարհն է: Սլովակիայի կառավարությունը մասնակցել է բոլոր մետաքսե ուղիների քննարկումներին, և կարծես ամենից շահավետը Սլովակիայի համար հանդիսանում է Գրիգորյանի առաջարկված նոր ճանապարհը: Սլովակիան շատ հետաքրքրված է Հայաստանին «Մետաքսե ուղու» գործընթացների մեջ ներգրավելու համար:

Նախարարը հայտնեց նաև ափսոսանք, որ Երևան-Բրատիսլավա օդային հաղորդակցության բոլոր պայմանագրերը ստորագրելուց հետո ինքնաթիռային թռիչքներ չեն իրականացվել դեռևս: Սլովակիայի նախարարը նաև ցանկություն հայտնեց մասնակցելու Հյուսիս-հարավ ավտոմայրուղու կիսատ մնացած շինարարության ավարտին հասցնելու աշխատանքներին. չէ՞ որ Սլովակիայի հայտնի շինարարական ընկերությունները մեծ փորձ ունեն բարձրորակ ավտոմայրուղիներ կառուցելու հարցում:

Պարոն Գրիգորյանն առաջարկեց շտապ կազմակերպել Հայաստանի տրանսպորտի և հեռահաղորդակցման նոր նախարարի` Վահան Մարտիրոսյանի և Սլովակիայի գործընկեր`Ա րպադ Երշեկի միջև հանդիպումը: Մոտակա ժամանակներում կիրականացվեն փոխադարձ պաշտոնական այցերը, և գործընթացները կարագացվեն: